Ukiortaami oqaaseqaat Atassummit isornartorsiorneqarpoq, Demokraatilli nersualaarinnipput

Naalakkersuisut siulittaasuata ukiortaami oqalugiaataa Atassutip karakteeriliisarneq 13-imut killeqartoq atorlugu 7-imik tunerusuppaa.

- 7, pissutigalugu meeqqat inuusuttullu iluanni suliniarneq socialimut tunngasoq, tassani ajunngitsumik suliniuteqartoq isumaqarpugut, Atassutip siulittaasua, Gerhardt Petersen oqarpoq.

Tassa illuatungiliuttut 13-imik karakteerileerusunngillat. Inuussutissarsiornermik siuarsaanermut tunngasoq Atassutip amigaatigivaa:

- Siullermik inuussutissarsiornerup tungaatigut amigaatigaarput inuutissarsiutigineqarsinnaasut nutaat, pingaartumik aatsitassarsiornerup iluani, isiginnaartuuginnaqqissanngikkutta Atassumminngaaniit isumaqarpugut annertunerusumik aatsitassarsiornerup tungaatigut ilinniartitsisariaqartugut, taavalu aamma taakkua ilinniarsimasut atorluarlugit ingerlatseqqissasugut.

Siulittaasup oqalugiaataani ilinniartitaanermut tunngasoq Atassutip karakteriliinerani apparsaavoq:

- Tassa siullermik nuannaarutigaarput ilinniartitaanerup tungaatigut amerlanerujartuinnarmata, aamma amerlasuut ilinniarusummata.

Naalakkersuisooqataasulli, Demokraatit, akerlianik nersualaarinnivissorput, Atassutikkullu tigussaasunik taakkartuisoqannginnera takorluukkanillu imaqannginneraanerat ileqimisaartuutigiinnarlugu:

- Iluamik paasisinnaanngilara illuatungiliuttut sooq taama isummersorsimanersut, uanga isumaga naapertorlugu toqqaannartumik oqariartuutit amerlasoorujussuit siornatigut saqqummiunneqarneq ajorput, Demokraatit siulittaasuat, Ineqarnermut naalakkersuisoq, Jens B. Frederiksen, oqarpoq.

Kuupik Kleistip oqalugiarnermini meeqqat kinguaassiuutimikkut atornerlugaasut eqqartorsinnaammagit Jens B. Frederiksenip nuannaarutigaa:

- Tassa naalakkersuisut siulittaasuata oqaaseqaataani sorpassuit assigiinngitsut uagut nuannarivagut, pingaartumik nuannaraarput naalakkersuisut siulittaasuata isertuutinngimmagu inuiaqatigiit akornanni ajornartorsiutit amerlasuut imaannaanngitsut aaqqiivigisariaqarivut. Isumaga naapertorlugu naalakkersuisut siulittaasuata ukiortaami aatsaat oqalugiarnerani taama toqqaannartigisumik taavai, tassuuna politikkikkut ersarissumik nassuerutigineqarpoq ajornartorsiuteqartugut imaannaanngitsunik.