Ukiortaami anguniakkat naammassisinnaaviuk?
Amerlasuut ilisarisajunnarsivaat. Juullikkunni mamarluartunik nerineq puallarnarsinnaasartoq. Taamaammat ukiortaamiit sanigorsalersut takussaalluartarput. Misilittakkalli takutippaat amerlasuut anguniagartik taamaatiaartaraat.
Nuummi timigissartarfiit ilaat Fit & Fun decembarimi juullimut pikkunnerup nalaani inoqarpiartarsimanngilaq.
- Misilittakkat ersersippaat amerlasuut januarimi ilaasortanngortanngortartut. Qaammatilli tulliani ilaasortarisavut ikileriaqqittarput, qujanartumilli tamarmik taamaatitsineq ajorput, Naja Heilmann Fit & Funimiit oqarpoq.
Ukiortaamiit timigissartalersut tassaanerusarput arnat ukioqqortusilaarlersut.
Nuummi illorsuarmi timersortarfimmi timigissartarfik nutaaq ukiarmi aatsaat ammartoq ukiortaamiit sanigorsartunik suli misilittagaqanngilaq. Taamaattoq ilisimatitsissutigaat sanigorserniartunik iligiiaanik pilersitsisimallutik.
Illoqarfimmi timigissartarfiit pingajuat Nuuk Fitness, Fit & Fun-imit oqaluttuarineqartumut eqqaanartunik misilittagaqarpoq. Januaarimi aggertartut amerlariarlutik qaammatip tulliani ikileriartarput. Amerlasuulli anguniakkaminnik taamaatitsiinnartarnerat nassuiaatissaqartippaat.
- Januarimi sanigorsarlutik aallartittut arlalitsigut sakkortuallaamik aallartittarput. Taamaattumik sakkortunaaraangamikku takkuteqqinneq ajorput, Karsten Sørensen Nuuk Fitnessimik piginnittoq oqarpoq.
Anguniakkalli ingerlatiinnarnissaannut siunnersuutinik aallertoqarsinnaavoq. Dronning Ingridip napparsimmavissuani inuunerissaasut nittartagaat http://www.amisut.gl pitsaanerusumik inooriaaseqalerusuttut isumassarsiorfigisinnaavaat.
- Tassami ukiortaami inuunerinnerulernissamik anguniagaqarneq qaammat ataasiinnaq atuunnani ukioq tamaat atuuttariaqarpoq, inuunerissaasunit Anna Rask Lynge KNR-imut oqarpoq.