Ukiorpassuarni 40.000-inik ecstacytorsimasoq

Angut 37-nik ukiulik, ukiut qulingiluat ingerlaneranni iisartakkanik ikiaroornartunik ecstasynik 40.000-nik iisisarsimasoq, Tuluit Nunaanni nakorsanit misissorneqarpoq, misissuinerullu inerneri saqqummiuneqarput.

Ecstasynik atornerluinerup angut puigutuunngortissimavaa. Oqaatsiminik ingasattumik uteqattaarilersarsimavoq nalunaaqutarlu qassinngornersoq eqqaamajuminaatsittarpaa. Pisiniarfimmilu nioqqutissat suut qamutinut ikisimanerlugit aamma puigortarlugu.

Ukiuni 17-ini ecstasy-mik atornerluilersimavoq. Ukiut siulliit marluk sapaatip akunnerisa naanerini tallimanik ecstacytortarsimavoq, ukiuni tullerni pingasuni pingasut affarlu ullormut iisarsimallugit. Ukiut sisamat kingulliit ecstacy-t 25-it ullormut iisarsimavai.

Fisternerit arlaanni ilisimajunnaaramili ecstacy unitsissimavaa. Angutip puiguttorsimagaluarluni ecstacyp sunniutaanik oqaluttuarisai paasissutissatut ilumoortutut nakorsat uppernarsaraat, nutaarsiassaqartitsivik BBC allappoq.