Siissisoq ukiuni 20-ni Ukiorpaalunni nipaassimasut tusarsaaqqilernissaannut piffissanngorpoq
Ilaasa nuannarinngilluinnarpaat. Ilaasali tupaallaatigalugit pikkusuutigaat. Ukioq manna ukiut 20-t qaangiussimalerput Siissisoq nuuteeqqamik saqqummersitseqqaarmat. Nuuteeraq "Aammarpassuillu" saqqummermat nunatta nipilersornikkut oqaluttuarisaanera allanngorpoq. Kapitali nutaaq aallartippoq.
- Soorlu inunnut tupatitserusussuseq pigigatsigu taamani soorlu ingasattajaalaartunik taallallit, nipilersoqatigiinni siuttuusoq aallarniisorlu Karl-Enok Mathiassen oqarpoq.
1994-imi Uummannami aasarisseruttorpoq. Nukappissat inuusuit marluk atuareerlutik angerlamut pisorusaarput. Nunatsinni nipilersoriaaseq kaaviinnalertutullusooq ilisimasoq qatsussimavaat. Nutaaliorusupput. Allanngueqataarusupput.
Metallica, The Doors White Zombiekkullu isumassarsianik aallerfigalugit Siissisoq pilersippaat.
- Tummerarsuarni issiaarluta oqarfigigakku: "Nammineq bandilioqisa?, Qanoq nuanneq, naalagaqarnata. Nammineq uagut isumarput atorlugu", Karl-Enok Mathiassen oqarpoq.
1998-imi nuusiorfiup ULO-p ingerlatitsisuisa erinnat tusarimikkik tupaallallutik alutorsarput:
- Soorunami qungujulallutalu pikkusullutalu YES!, taama eqqarsarpugut, Johan Henningsen, nuuteeqqamik immiussinermi ingerlatsisoq oqarpoq.
AAMMA ATUARUK Nipilersoqatigiinni Siissisumi inuttaviusut tusarnaartitsilersut
Tusarsaaqqilissapput
Siissisoq nunatsinni sukkasuumik tusaamaneqalerpoq. Nipilersoqatigiit nuuteeraq saqqummersereeramikku sinerissami, Danmarkimi Islandimilu tusarnaartitsisaqattaarlutik angalapput.
Ukiorpassuillu nipaassimaareerlutik tusarsaaqqilernissaannut piffissanngorpoq. Tassami nipilersoqatigiit nuuteeqqamik nutaamik novemberip 30-ani saqqummersitseqqissapput. Nuuteeqqap erinnat nutaannginnerit nutaarluinnaallu imarissaavaat.
- Saqqummertussat nutaat eqqarsaatigigaanni nammineq uanga inuttut toraarsimasakka nalaassimasakka inuunermut tunngassutillit taallarivaat, kisianni oqaatsit atukakka Siissisorpalaarnerinut qimatsinnaveersaarlugit nipeqartinniarsaraakka, Karl-Enok Mathiassen oqarpoq.
