Ukioq sunngitsoq sanaartulerusuppaat
Eqqumiitsulianik saqqummersitsivimmik Nuummi pilersitsiniartut illorsuup eqqumiitsulianik saqqummersitsiviup ukiup ataatsip ingerlanerani sanaartorneqarluni aallartinnissaa neriuutigaat. Qanorli akeqarnissaa suli ilisimaneqanngilaq.
- Taamanikkussamut sananissaanut aningaasaliisussanik pissarsiniariarutta qanoq akeqassanersoq nalunarunnaarumaarpoq, taamanikkut inissialiorneq kvadratmeeterimut qanoq akeqassanersoq apeqqutaassaaq, Josef Motzfeldt oqarpoq.
Illorsuup sananeqarnissaanut aningaasaliissutissat ukiut marluk qaangiutsinnagit siulersuisunit pissarsiarineqareernissaat pilersitsiniartut siulittaasuata Josef Motzfeldtip pingaartuunerarpaa. Tassami titartaasartunik ajugaasitsereernermi ukiut marluk qaangiutsinnagit sanaartortoqalinngippat illussanik titartaasartut
Københavnimeersut Bjarke Ingels Groupimeersut (BIG), ukiut marluk iluanni saqqummersitsivissamik sanaartorneq aallartinngippat aningaasanik taarsiivigineqassapput.
Namminersorlutik Oqartussat nunatsinni eqqumiitsuliortut saqqummersitsivissaannut 600.000 koruuninik aningaasaleereerput.
Illussanik titartaasartut unammisitsinermi peqataasut tamarmik 200.000 koruuninik akissarsisinneqarput. Ajugaasut immikkut akissarsisinneqanngillat.
Josef Motzfeldtip oqaatigaa nunatsinni eqqumiitsuliortut saqqummersitsivissaata ingerlanneqarnera Kommuneqarfik Sermersuup, Namminersorlutik Oqartussat allallu aalajangersimasumik ukiut tamaasa aningaasaleeqataasartussat aningaasalersorsinnaajumaaraat, erseqqissaatigaalu siulersuisuujumaartut isumaqatigiissutigiumaaraat.
Nunatta karsia imaqanngikkaluartoq kinguaariit kinaassutsimut ilisimaarinninnissaat qulakkiissallugu ilaatigut Nunatta Eqqumiitsulianik Saqqummersitsivia sananeqassaaq.
- Nunatsinni pisortat saqqummersitsivissap sananeqarnissaani akileeqataanissaat naatsorsuutigineqanngilaq, aamma suliffeqarfippassuit inuppassuarnik sulisulerlutik nunatsinnut iserusuttut amerlapput, Kalaallit Nunaata nutaaliaasup kinaassusaata illersornissaa, eqqumiitsuliortortatta suliaanut naammaginartumik saqqummersitsiveqarnissaq aatsaat taama pingaartigilerpoq, Josef Motzfeldt oqarpoq.
