Ukioq manna pisavit nalunaarutiginissaat eqqaamallugu

Inuussutissarsiutigalugu piniarsinnaanermut allagartallit, sunngiffimmilu piniarsinnaanermut allagartallit amerlasuut, ukiumoortumik immersugassatik Naalakkersuisoqarfimmut suli nassiussimanngikkaat, Aalisarnermut, Piniarnermut Nunalerinermullu Naalakkersuisoqarfiup nalunaarutigaa.

Pisat pillugit ukiumoortumik immersugassamik immersuinerup nassatarisarpaa ukiumut aggersumut namminerisamik piniarsinnaanermut allagartap nutarterneqartarnera, Naalakkersuisoqarfiulli nalunaarutaa allagartalinnut immaqa eqqarsalertitsissaaq.

Sunngiffimmimi piniarsinnaanermut allagartallit 46 procentiinnai ukiumoortumik immersugassartik immersorlugulu Naalakkersuisoqarfimmut nassiussimavaat, inuussutissarsiutigalugulu piniarsinnaanermut allagartallit taamaallaat 75 procentii immersukkanik nassiussisimallutik.

Sunngiffimmi piniarsinnaanermut allagartallit 2000-it missaanniittut inuussutissarsiutigalugu allagartallit 500-t missaanniittut immersugassamik nassiussisimanngillat.

Allatulluunniit oqaatigalugu: Inuit amerlasuut piniarsinnaanermut allagartaminnik nassiussiffigineqassanngillat ukiumoortumik immersugassaataat Aalisarnermut, Piniarnermut Nunalerinermullu Naalakkersuisoqarfimmi pissarsiarineqarsimatinnagit, imminnulluunniit sullissivitsgut www.sullissivik.gl -imi immiussimatinnagit:

- Pisat pillugit ukiumoortumik immersuisoqarsimanngippat, aamma pisaqarsimanngikkaluaraanniluunniit, taava piniarsinnaanermut allagartamik 2016-imoortumik nassiussisoqarsinnaanngitsoq, Aalisarnermut Naalakkersuisoqarfimmi immikkoortortami pisortap Amalie Jessenip erseqqissaatigaa.