Ukioq manna Nuummi sikumik ilusilersuinissaq siunniuppaat
Nuummi apummik ilusilersuinissaq ukioq manna taamaatiinnarneqarpoq. Silap pissusaata allanngoriartornerata kingunerisaanik aaqqissuussisartut apummik ilusilersuisarunnaarluni sikumik ilusilersuisalernissaq siunnerfigaat, taamaalilluni aputeqarnera apeqqutaajunnaarniassammat.
Allattoq Jaaku Lyberth
marsip 05-at 2009 06:56
Tassami aaqqissuisut isumaqarput, Nunatta avammut nittarsaannera tamatumuunakkut ingerlatiinnarneqarsinnaasoq. Takornariaatigalutik peqataarusuttut aamma periarfissinneqarniassammata.
Aammami ajornartoortoqassagaluarpat qerititsivissuarmi sikuliortoqarsinnaassammat.
- Nuummi soqutiginartumik ingerlatsinissaq pingaaruteqarpoq, taamaalillunimi illoqarfik nunap sinneranut nunanullu tamalaanut soqutiginarsarsinnaaniassagatsigu. Aaqqissuisullu sikumik ilusilersuisalernissaq aqqutissiuunniarlugu ukioq manna atorniarpaat paasiniaanernut, pilersaarusiornermut, atortussanik pissarsiornermut kiisalu ileqqussanik nutaanik ujartuinissamut.
