Ukioq manna kapisilinniarneq pingasunngorpat unissasoq

Ukioq manna kapisilinniarneq aqagu pingasunngornermi oktobarip ulluisa 31-anni unitsinneqassaaq. Kalaallit Nunaanni Aalisarsinnaanermut Akuersissutinik Nakkutilliisoqarfik, KANUAANA, taama nalunaaruteqarpoq.
Assi © : Julia Manzerova/Flickr Creative Commons
Allattoq Mads Lynge
oktobarip 30-at 2018 08:26

Tamanna pissutigalugu piffissap siuliani taaneqartup kingorna kapisilinniarneq inerteqqutaalissaaq, soorlu aamma qassutit tamarmik oktobarip ulluisa 31-anni qaqinneqareersimassasut.

Inuussutissarsiutigalugu kapisilittarineqarsimasut KANUAANA-mut nalunaarutigineqassapput.

- Aalisartut tamarmik kapisilinniarnissamut akuersissuteqarlutik allagartallit kapisilinniaraluarlutik pisaqarsimanngitsut kapisilittanut nalunaarsuiffissaq 0-imik nalunaarlugu nassiutissavaat. KANUAANA taama erseqqissaassuteqarpoq.

Kapisilimmik meqqilimmik pisaqartoqarsimappat, meqqip Pinngortitaleriffimmut nassiunneqarnissaa kaammattuutigineqarpoq, NASCO-p ukiumoortumik tulliani ataatsimiinnissaanut atatillugu makitsinermi taava peqataasoqarsinnaalissaaq.
NASCO ukiut tamaasa eqqugassamik 1.500 U.S. dollarsinik aningaasartalimmik makitsisarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq