Ukioq ataaseq maluginiagassartaqarpallaanngitsoq

Namminersulernerup eqqunneqarneraniit ukioq ataaseq qaangiuppoq. Inuilli aqqusinermi apersorneqartut allanngornermik maluginiagaqanngillat.

- 'Tigussaasumik suli kinguneqartitsinngilagut' - 'Uannut annerusumik malunniuteqanngilaq', akissutit tamakku namminersornerup eqqunneqarneraniit ukiup ataasinngornerani aqqusinermi apersorneqartut akissutigigajuppaat. Tamannalu tupigisassaanngitsoq Nunatta ineriartorneranut malinnaasut naliliipput.

- Politikkikkut aalajangersakkat ullutsinni atukkatsinnut toqqaanartumik sunniuteqanngippata, malugiunnanngilarput, kisianni politikkikkut akisussaaffiit tigujortukkagut amerliartortillugit malunniukkiartulerumaarput, Innuttaasutut inooqatigiinnermi immikkut ilisimasalik Steven Arnfjord, Ilisimatusarfimmi atorfilik, taama oqarpoq.

Aaqqissuisoq soraarneq Jørgen Fleischer Steven Arnfjordip oqaasiinut isumaqataavoq.

Nunarput aningaasameertillugu allaanerusinnanngilaq:

- Isumaqartoqarsinnaanngilaq ukiup ataasiinnaap ingerlanerani sorpassuarnik pisoqassasoq, nunarput aningaasaateqanngilaq. Namminersornerup eqqunneqarnera ilutigalugu piviusorsiorneq eqqunneqartoq, qallunaaallu oqartarnerattut Naalakkersuisut "nunamut illuttut tummarput" innuttaasullu akisussaasuseqarnerusutut misigisimalissasut, Jørgen Fleischer naliliivoq.