Ukioq 2009 tusagassiornermut peqqarniitsuusimavoq

Tusagassiortut nunarsuatsinni sumi tamaaniittut 2009-mi toqutaasut 76-iusimapput, 2008-mi toqutaasut 60-iusut, suliniaqatigiiffik Journalister Uden Grænser (RSF) nalunaarpoq.
Allattoq Elisa Isaksen
decembarip 30-at 2009 10:49

Tusagassiortut qimarngunneqartartut aamma amerleriarput, ukiormannalu 33-usut, siorna 29-usimapput.

Tysklandimi nutaarsiassaqartitsivimmit dpa-mit nalunaarutigineqarpoq, RSF-imit oqaatigineqartoq, tusagassiortut toqutaasut amerleriarnerannut Filippinerini novembarimi tusagassiortut 30-t toqutaanerat pissutaasoq.

Nunat allat tusagassiortunut toqqissisimananngitsut tassaapput, Somalia tusagassiortut qulingiluat toqutaaffigisaat aamma Pakistan Ruslandilu tamarmik tusagassiortut tallimat toqutaaffigisaat.

Aamma nunat tusagassiornermik killilersuiffigineqalersut amerleriarsimapput. Nunat taakku 2008-mi 37-ugaluariarlutik 2009-mi 60-inngorsimapput. Ilaatigut tusagassiortorpassuit Iranimit Sri Lankamiillu aallararsimapput.

- Nunani taakkunani oqartussat paasisimavaat, tusagassiortut aallararnissaat nukingisaarutigigaanni, tamanna isumassarsiorsinnaanissamut isornartorsiuinissamullu milleriartitsingaatsiartartoq, Jean-Francois Julliard RSF-ip allaffeqarfiani pisortaasoq oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq