Ukiaru aatsaat meeqqanik pinerliisimannginnermut uppernarsaatit atuutilissapput
Nakorsat, meeqqerisut napparsimaveqarfimmiut, timersornermi sungiusaasut assigisaallu meeqqanik pinerliisimannginnermut uppernarsaammik piumasaqarfigeqqaanngikkaluarlugit ullumikkut atorfinitsinneqarsinnaapput.
Naalakkersuisut siorna ukiaanerani ataatsimiinneranni, partiit tamakkiisut meeqqanik pinerliisimannginnermut uppernarsaatip inatsisitigut atuutilernissaa akuersissutigaat, ullorli manna tikillugu suli atuutilinngilaq.
Namminersorlutik Oqartussani inatsisileritooq Ane Marie Sakariassen oqarpoq Justitsministereqarfimmiit tusarniaanermut akissutinik utaqqineq pissutaalluni upernaamut kinguartinneqartoq.
Meeqqanik pinerliisimannginnermut uppernarsaatip qulakkeertussaagaluarpaa meeqqanik sullissisut meeqqanik arornerluisimasutut pillarneqarsimasut meeqqat ornittagaani suniluunniit atorfinitsinneqarsinnaajunnaarnissaat.
Inatsisip Qallunaat Nunaanni atuuttup tunngavia qimanngikkaluarlugu susassaqarfinnut assigiinngitsunut immikkoortiternagu, inatsit tunngaviusoq ataaseq tamanut atuuttussanngorlugu siunnersuutigineqarpoq.
Inatsit akuerineqassaguni aggustip aallaqqaataani 2010-mi atuutilertussatut siunnersuutigineqarpoq.
Namminersorlutik Oqartussani inatsisilerituup Ane Marie Sakariassenip erseqqissarpaa, suliffeqarfimmi sumiluunniit atorfinitsitsinermi pinerlussimanermut allagartamik piumasaqaateqarsinnaaneq periarfissaajuaannarnikuusoq, meeqqanik pinerliisimannginnermut uppernarsaatip inatsisitigut atuutilernissaa utaqqeqqaanngikkaluarlugu.
