KNR Ukiaanerani aallakaatitassiat nutaat – kikkunnut tamanut
Ilaqutariinnut aliikkutassiaq
Tallimanngornermi unnukkut ilaqutariinnut aliikkutassiaq tv-kkut aallakaatinneqartassaaq. Andreas Poulsen radiomi tusarsaajunnaarluni tv-kkut saqqummertalissaaq, nipilersortartut erinarsortartullu Glenn Mølller aamma Nukannguaq Geisler ingiortigalugit nipilersukkanik erinarsukkanillu eqqorniaallutik unammisinneqarneranni.
Qangattaq - illoqarfinnut allanut
Nûno Isbosethsen, Nathan Kreutzmann suleqataasalu illoqarfinnut aallakaatitsiartortarnitik nangillugit septemberip naanerani Qaanaamit aallakaatitsissaput. Pisarnermisullu aallakaatitsinerup naanerani illoqafik tikitassartik tulliuttoq saqqummiuttarumaarpaat, tikitaminnilu innuttaasunik ilisarisimaneqarluartunik pulaartoqartassapput, nipilersortoqartassallutik tikitamilu immikkuullarissutai ilanngutassiarisassallugit.
Aliikkusersuineq eqquiniaatitsinerlu
Gaaba Olsen aamma Angajo Lennert-Sandgreen ullaap tungaani quliniit radiokkut aliikkusersuisassapput. ”Ullukillisaarfik” nunatsinni nunarsuarmilu pisut aallaavigalugit, tusarnaartartut pulaartullu peqatigalugit aallakaatinneqartassaaq, tallimanngornikkullu KNR-ip aallakaatitassiai tigulaariffigalugit sms-erluni eqquiniaatitsinermik naggaserneqartassalluni.
Inuusuttut silarsuaannit
Nipi ilisarnartoq alla inuusuttunut aallakaatitassiami tusarsaalissaaq. Sara K. Jakobsen radioaviisimit tusartagarput ualikkut marluniit pulaartoqarluni, telefonikkut oqaloqateqarluni nittartakkakkullu attaveqaqatigiiffiit atorlugit inuusuttut silarsuaannit aallakaatitsisassaaq. Inuusuttut eqqarsaataat, misigisaat oqariartuutaallu aallaavigalugit assigiinngitsorpassuarnik sammisaqartassaaq. Soorlu aamma pissutsit inuusuttunit nuannarineqarluartut aamma inuiaqatigiinni politikkimilu pisut sammineqartarumaartut.
Aallaatitassiat takinerusut amerlanerit
Aallakaatitassianik takinerusunik tusarnaartartut ujartuinerat KNR-ip maluginarpaa. Taamaammat Malînánguaq M. Mølgaard, Salomine Tobiassen, Andrea Christiansen aamma Erninnguaq Reimer ulluinnarni nal. ataatsimiit aamma sapaatit akunnerisa naanerini assigiinngitsunik sammisaqarfiusunik akunnerup ataatsip ingerlanerani aallakaatitsissassapput. Ukiaanerani ukiuuneranilu aallakaatinneqartartussat qilanaartuugereersinnaasavut tassaapput; ilisarititsinerit, aallakaatitassiat inuttut ineriartorneq pillugu isumassarsiorfiusinnaasut aamma aallakaatitassiat ”Nunarput digitaliusoq” kiisalu ”Nunarput nunarsuarmioqataasoq”.
Stina avalaassisaleqqittalissaaq
Stine Skiftep nipilersukkanik aallakaatitsisarnera nuannarineqarluartoq ”Avalaappakkit” qilanaarineqarsinnaasut aamma ilagaat. Arfininngornermi unnukkut nal. arfineq-pingasunut radio nippaamiannguarlugu avalallattaartoqarsinnaanngoqqissaaq. Stina Skiftep aallakaatittagaata tusarnaartartunit maqaasineqarnera aamma KNR-imit maluginiarneqarpoq, Stinalu radiomi suliunnaareeraluartoq avalaassisaleqqinnissaanik isumaqatigiissuteqarfigineqarmat tusarnaartartut kissaataat taamaalilluni aamma piviusunngussaaq.
Pingasunngorneq oqalliffik
Soorunami aamma Oqalliffik aallakaatinneqartassaaq. Itisiliilluni oqallititsinerit pingasunngornerit allortarlugit radiokkut tv-kkut aallakaatinneqartassapput, pisarnertullu sammineqartut nittartakkakkut attaveqaqatigiiffiit atorlugit siammarterneqartassallutik.
Aallakaatitassiat nutaat tusarnaartartut isiginnaartartullu isumasiorneqarnerat aallaavigalugu aamma suliffeqarfiup ukiut tamaasa nutaanik aallakaatitassiornissamik pilersaaruteqarnera aallaavigalugu pilersinneqarput.
