Ukaliatsiaq nersornaasigassanngortinneqarpoq
Ukaliatsiaq Danmarkip katersugaasivissuani nunarput pillugu ilisimatusartut suleqatigalugit pilersinneqarpoq, titartakkanillu nangeqattaartuliat allat peqatigalugit Kalaallit Nunaata oqaluttuassartaanik oqaluttuartuullutik.
Nersornaasiuttagaq siorna pilersinneqartoq siullerpaamik tunniunneqartussaavoq. Eqqumiitsuliat katillugit 14-t nersornaasigassanngortinneqarsimapput, nersornaasiinissarlu nunani avannarlerni kulturikkut nersornaasiinerit allat sisamat peqatigalugit Nordisk Sessionimi Oslomi oktobarip 30-iani pisussami pissussaavoq. Nersornaat 350.000 koruuninik aningaasartaqarpoq.
- Katersugaasivissuarmi suleqatikka assingalugit nuannaaqaanga. Ajugaanissarput neriuutigaarput, kisianni nersornaasigassanngortinneqarnerput soorunami pingaarnersaavoq, Nuka Godtfredsen nuannaarpaloqaluni KNR.gl-imut oqarpoq.
Nangeqattaartuliami immikkoortuata pingajua maanna ingerlappaa, aammalu immikkoortut sisamassaannut aningaasaliissutissanik nassaarsinnaassalluni neriuutigalugu, taamaammat 350.000 koruuninik akissarsitinneqassaguni sumut atussanerlugit nalunngereernerarpaa.
Nuka Godtfredsenip saniatigut aamma Mariane Petersen atuakkiortunut nersornaasiuttakkamik nersornaasigassangortinneqarsimavoq. Aammattaaq atuakkiortup danskip Norgemi najugallip Kim Leinep atuakkiaa, profeterne i Evighedsfjorden, Kalaallit Nunaanni 1800-kkunni pisimasuutinneqartoq nersornaasigassanngortinneqarsimavoq. Ajoraluartumik kalaallit filmiliaannik nersornaasigassanngortitsisoqarsimanngilaq. Nipilersornikkulli aamma pinngortitamut avatangiisinullu nersornaasiuttakkamut suli nersornaasigassanngortitsisoqarsimanngilaq.
