Ujarassuit maarmorit Nunatsinneersut Københavnimi nassaarineqartut
Itsarnisarsiuut Københavnip Katersugaavisianeersut illoqannginnersap assaassutinik inissianut sanaartorfigissarneqannginnerani tamakkerlugu misissuiffigisimavaat.
Itsarnisarsiuup Niels Andreasenip maarmorip Kalaallit Nunaanneernissaa qularutiginngilaa - minnerunngitsumik 1930-ikkuni assilisaq Arktisk Institutimeersoq tunngavigalugu, tassanimi ujarassuit maarmorit illoqannginnersami qaleriiaanneqarsimasut takuneqarsinnaammata.
- Illunik kusassaatissatut immaqa Danmarkiliaanneqarsimapput, soorlu tummeqqiassatut, flisessatut assigisaanullu.
Itsarnisarsiuut umiarsuit usii pillugit toqqorsiviit maanna misissuiffiginiarpaat, ujarassuarnik maarmorinik nassitsisunik tigusisunillu nassaarsinnaanissartik neriuutigalugu.
Issoq 150 tonsinik oqimaassusilik immikkut misissugassatut ujarassiuunit allamukaanneqarsimavoq, ujarassuillu nassaarineqartut saniatigut Kalaallit Nunaanneersunik allanik nassaartoqarnissaa Niels Andreasenip ilimaginngilaa. Illoqannginnersamimi siornatigut allanngortiterisoqarneranut atatillugu issoq nunap qaavaniittoq piiarneqarsimavoq, issorlu taarsiutigalugu atorneqartoq Københavnimi sumiiffinnit allaneersuulluni.
