Ujarassiuut soqutigineqartut
Ilannguaq Lennert Olsen, Ice Cold Gemsimi piginneqataasoq, piginneqatini ilagalugit USA-mi Arizonami ujaqqanik takutitsinermi rubinit, tugtupitit ujaqqallu allat nassarlugit, peqataaqqammerpoq, sapaatillu akunneri marluk paasissarsioreerlutik pissarsilluarsimallutik oqaluttuarpoq.
USA-mut angalanerminni anguniagaasa ilagaat paasissallugu ujaqqat Nunatsinneersut soqutigineqarnersut.
- Paasivarput ujaraatigut nunarsuarmi piumaneqartorujussuusut. Annerusumik rubiniutigut piumaneqarput, Ilannguaq Lennert Olsen KNR.gl-imut oqaluttuarpoq.
Taanna aamma oqarpoq, ujaqqat Nunatsinneersut piumaneqarnerinut ujaqqat pinnersaasiassat nunaqavissunit piiarneqarsimaneri suliarineqarsimanerilu pissutaasoq.
- Ujaraatitta piumaneqarnerinut pissutaavoq uagut nunaqavissutut takanunga (USA-mut, aaq.) nammineq apuunnerput uajaraatigullu takutillugit. Arnat pisisartut, aningaasaatillik, soqutigilernikuugamikkit pinnersaasiassat suminngaanneersuuneri. Pinnersaasiat piumaneqarnerpaat tassaapput nunaqavissuniit piiarneqarnikut, suliareqqinneqarnikut tuniniarneqarlutillu, Ilannguaq Lennert Olsen oqaluttuarpoq.
Aamma atuaruk Rubinit nunatsinneersut USA-mi nittarsaanneqalersut
Annikitsumi aatsitassarsiortut neriulluartut
Ice Cold Gemsimi piginnittut, nunaqavissuusut, neriuutigaat aatsitassanut naalakkersuisoqarfiup inatsisit annikitsumi aatsitassarsiortunut inatsisit naammassilluassagaat, tassami aningaasarsiorluarnissamik neriuuteqaramik. Pingaarnertulli kallaallit nunarsuup sinnerant ilisimaneqarlualissasut.
- Neriuutiginerpaavarput uagut kalaallit pinnersaasianik nunaqavissut sanaavinik kusanartunik tunisassiortutut nunarsuarmi ilisimaneqalernissarput. Aamma neriuutigaarput Nunatta aningaasaqarniarneranut ikiuutaasinnaalluta, Ilannguaq Lennert Olsen oqaluttuarpoq.
Ilannguaq Lennert Olsen Ice Cold Gemsimi piginneqatini, Hans Henrik Berthelsen, Aqqaluk Kreutzmann aamma Miki Mølgaard, peqatigalugi angalanerminni ujaraataat soqutigineqarsimapput tunisaqalaarsimallutillu.