Ujarassiortuaqqanik illersuisup nunaqavissut taperserpai

- Maani innuttaasut inuussutissarsiutigisamik saniatigut allatigut isertitaqarniarsarisariaqartartunut - assersuutigalugu aalisarnermik piniarnermillu ingerlataqartunut - saniatigut aatsitasseriffeeqqamik ingerlataqarnissaq periarfissagissaartuuvoq, taamaattumik Kalaallit Nunaat annikitsunnguakkaartumik aatsitassarsiornermik ingerlatsivissaqqissorujussuuvoq, Greg Valerio oqarpoq.

Greg Valerio oqarpoq nammineq Amerikkami Kujallermi inuiaqatigiit assigiinngitsut taamatut periaaseqarlutik inuussutissarsiortut suleqatigisarsimallugit.

- Taqqavani innuttaasut ilaat guultsisiorfeeqqamik ingerlatsisarput, taamatut ingerlatsinermik saniatigut puulukiuteqarnermik ingerlatsiutigalutik, Greg Valerio oqarpoq.

- Maani taamatukanneq periaaseqarluni inuussutissarsiornermik ingerlatsisoqalernissaanut periarfissagissaarluartoq isumaqarpunga, taamatullumi periaaseqartoqalissappat nunami maani aningaasarsioriaatsimik nutaarluinnarmik pilersitsoqassagaluarpoq, Greg Valerio oqarpoq.

Taavami apeqqutaalerpoq taamatut aatsitassarsiorfeeqqanik ingerlatsisut aatsitassarsiorfiillu anginerit sanileriillutik piiaveqarnissaat ilumut ajornassannginnersoq.

- Ilaannarujussuaq - soorunami. Ilami imaakkami aatsitassat ilaat eqqarsaatigalugit aatsitassarsiorfinnik angisuunik pilersitsisoqartariaqartarpoq, tamannalu tunngavigalugu aatsitassarsiorfiit angisuut pisariaqartinneqartuartussaapput. Kisianni aatsitassarsiorfeeqqanik pilersitsiortortoqarnissaa aamma pisariaqartoq isumaqarpunga aatsitassarsiorfeeqqanik pilersitsiortortoqarpat, angisuunik aatsitassarsiorfilioqattaarnermut sanilliullugu suliffissat amerlanerusut pilersinneqarsinnaassagaluartut, Greg Valerio oqarpoq. Taassuma erseqqissaatigaa aatsitassarsiorfiit angisuut mikisullu tamarmik pisariaqartut, pisariaqartinneqanngilluinnartorooq tassatuaavoq aatsitassarsiornermik aallutaqartut akunnerminni imminnit allaanerusumik periaaseqarlutik ingerlatseriaaseqartunut akeqqersimaartutut - akueriuminaatsiterpalaartumillu - pissusilersortarnissaat, Greg Valerio oqarpoq.

Suliniaqatigiiffiup Alliance for Responsible Miningip nunatsinni Peqatigiiffik 16. august ilaasortartaareqqammerpaa.