Ujaqqat erlinnartut pillugit novembarimi ataatsimiittoqassaaq
Ujaqqanik erlinnartunik katersisartut isumaqarput erlinnartunik katersisarnertik pissutigalugu pinerluttuliorsimasutut isigineqarlutik. Peqatigiiffimmik aallarneeqataasoq Niels Eske Madsen, taama oqarpoq.
Naalakkersuisoq Kim Kielsen, rubinit katersorneqarsimasut pillugit ima oqarpoq:
- Avammut niuerutigineqassappata aatsitassanut pisortaqarfimmut soorunami saaffiginnittariaqassapput, periarfissatillu tassani paasisaqarfigissallugit. Inuiaqatigiit qanoq pissarsiaqassanersut aamma paasineqassaaq, Kim Kielsen oqarpoq, nangipporlu:
- Inuit 3000-it sinnerlugit atsiorsimapput, kisitsisilli suli takunngilakka, kisianni takussavagut misissuataarumaarlugillu. Kisianni aamma oqaatigissavara aaqqiisoqarnissaa pillugu upernaarli suliaqaratta. Inatsit piusup iluani periarfissat suunersut qulakkeerniarsaraarput, aatsitassanut naalakkersuisoq Kim Kielsen oqarpoq.
Kalaallit Nunaanni Aatsitassat Ikummatissallu pillugit Siunnersuisoqatigiit novembarimi ataatsimiilerpata siunnersuutinik marlunnik saqqummiussisoqassaaq.
Ujaqqanik erlinnartunik katersisartut peqatigiiffiat 16.august 2007-imik imminut taagortoq akerliussutsimik ullumi takutitsivoq, aatsitassanut pisortaqarfimmiit inatsisartut ataatsimiittarfiata tungaanut ingerlaaqatigiittoqarluni.
