Ujaqqanik katersisartut inatsimmi nutaami ilanngunneqassapput
Kalaallit Nunaanni najugallit tamarmik ujaqqanik ukiumut 100.000 koruunit tikillugit, inatsit nutaaq naapertorlugu, katersisinnaatitaalissapput.
Katersinissamut akuersissummik pisariaqanngilaq, sumiluunniillu katersisoqarsinnaassaaq, suliffeqarfiit inuilluunniit ataasiakkaat kisermaassisussaatitaaffiini taamaallaat katersisoqaqqusaassanani.
Paasiniaanissat atorluaanissallu nutaat inatsisimmi nutaamiipputtaaq.
Tassa inuit Nunatsinni najugallit tamarmik sumiiffinni aalajangersimasuni kvadratmeterimik ataatsimik annertussusilimmi ujaqqanik kisermaassillutik katersisinnaanissaminnut periarfissaqalissapput. Taakku avatangiisit pillugit allatulluunniit nalunaarsuisassanngillat, soorlu suliffeqarfissuit taamaaliortassasut, ujaqqanilli katersisut maskiinanik angisuunik atortoqaqqusaanngillat, kisianni soorlu ikuttaat, kaataq qussaatarlu sakkugineqarsinnaassapput.
Aatsitassat pillugit inatsisissaq Inatsisartuni suliarineqaleruttorpoq. Sapaatip akunnerani kingullermi siullermerneqarpoq, qaammammilu uani kingusinnerusukkut akuerineqassalluni.
