Ujaqqanik erlinnartorsiorneq aallarteqqilerpoq
Canadamiut suliffeqarfiutaata, True North Gemsip, Qeqertarsuatsiaat eqqaanni aasaru aatsitassarsiornissaminut pilersaarusiani naammassivai, rubiininik safirinillu ujaasiffigisaminni, 110 kvadratkilometerinik annertutigisumi, ujaasinertik nangeqqissallugu.
Canadamiut aningaasaat, 3 millioni dollarsit – tassa
15 millioni koruunit missaat – ujaqqanik erlinnartunik taakkuninnga ujaasinissamut - juunip qaammataaniit septembarip naajartornerata tungaanut ingerlanneqartussamut, immikkoortinneqarsimapput.
Aatsitassarsiorluni aasaru sulinissamut pilersaarutit tassaapput; diamantinik ujaasilluni qillerinissaq, ujaqqanik misissugassanik katersinissaq taavalu Qeqertarsuatsiaat eqqaanni nuna assiliornissaq.
Misissoqqitassanik suliarineqanngitsunik, suliareqqitassanilli, 50 tonsit missaanniittunik katersinissartik True North Gemsip naatsorsuutigaa.
Ujaqqat misissugassat sukumiinerusumik suliareqqaartarnissaat eqqarsaatigalugu Qeqertarsuatsiaani aserorteriviliorniarluni True North Gemsip aamma eqqarsaatigigaa, suliffeqarfissuup allaaseraa. Ujaqqanik erlinnartunik ukiuni tulliuttuni aatsitassarsiornissartik True North Gemsip isumalluarfigisorujussuuvaa.
