Ujalorlulersarneq ajoqusernertut isigineqalerpoq
Qarasaasialerinermi muusimik atuinikkut ujalorluuteqalersarneq sulinermut atatillugu ajoqusernertut isigineqartassasoq Sulinermi ajoqusernermi Danmarkimi Pisortaqarfimmit aatsaavissuaq akuerineqarpoq.
Kattuffimmi , HK-mi, tamanna assorsuaq naammagisimaarneqarpoq.
Taamaattorli suliffinni sulinermilu isumannaalisaanermi HK-mi siunnersortip, Svend-Erik Hermansenip, politikerit kaammattorpai ujalorlulersarnerup sulinermut atatillugu ajoqusernertut nalinginnaanerusumik ilumut akuerineqarnissaa suli sukataarutigineroqqullugu.
- Ujalorlulersimasut maannamut saaffiginnittarsimasut saaffiginnissutaannut tunngasut ilaat akuerineqarneq ajorput. Taamaammat ujalorlulersarneq sulinermut atatillugu ajoqusernertut isigineqalernissaa Folketingimi ilaasortanit ammaanneqartariaqarpoq, Svend-Erik Hermansen oqarpoq.
Qarasaasialerinermi tallikkut, tuikkut pukutsukkullu ujalorlulersarnerup sulinermut atatillugu ajoqusernertut akuerineqarnissaa sulinermut kattuffissuarnit ukiorpaalunni ilungersuutigineqarsimavoq, ippassarli ulloq tikillugu tamanna itigartitsissutaasarsimalluni.
