Ujakkaartartut Lapland-imi unammisut

Sapaatip akunnerata naanerani qaasuitsup killeqarfiani 150 kilometerinik avannarpasinnerusumi Lapland-imi ujakkaarluni unamminerit aallartipput kalaallinillu peqataasoqarpoq. Elite Sport Greenland-imit tapersersorneqartut Kalaallit Nunaanneersut Niviaq Berthelsen aamma Karl-Peter Kristensen Finlandimi FIS-imik appartoqarnerani ukioq manna peqataapput.

Ujakkaarluni unamminermi kalaallit unammeqataasut timersortartut allat 600-ut unammeqatigivaat. Tallimanngornermi sprint-erluni unammisoqarpoq. Arfininngornermi arnat 5 kilometerinik klassisk-imik ujakkaarlutik unammipput, angutit 10 kilometerit klassisk-imik ujakkaarlutik unammisut.  

Arfininngornermi 5 kilometerit klassisk-imik ujakkaarnermi Niviaq Berthelsen normu 122-iulluni apuuppoq piffissaq 16.23.93 atorsimallugu. Karl Peter Kristensen angutini 10 kilometerit klassisk-imik ujakkaarnermi normu 212-iulluni apuuppoq piffissaq 31.04.65 atorsimallugu, taama Elite Sport Greenland ilisimatitsivoq.

Sapaammi angutit 15 kilometerit fri teknik-imik unammisinneqarput. Karl-Peter Kristensen unammisuni 200-uusuni normu 186-iulluni apuuppoq, piffissaq  42.44.62 atorsimallugu. Niviaq Berthelsen sapaammi unamminernut ilaanngilaq. Angutini fri teknik-ernermi ajugaasuuvoq Finlandimeersoq Matti Heikkinen piffissaq 34.40.54 atorlugu apuussimalluni. Tjekkiamiit ilaasoq Lukas Bauer tulliulluni apuuppoq, sukkanerpaat pingajuat tassaavoq tyskeq Jens Filbrich.   

Niviaq Berthelsen Nuummeersuuvoq Karl-Peter Kristensen-ilu Aasianneersuulluni. Ujakkaartartut taakku Norgemi Tromsømi ilinniartuupput.