Ujakkaarluni nunarsuarmi pissartanngorniunnerni sukasaatinik atuisoqarnera paasineqartoq
Ujakkaartartut tallimat Østrigimi politiinit pingasunngormat tigusarineqarput. Taakku nakorsaatinik sukasaatinik atuisimasutut pasineqartut, Østrigimi politiit nutaarsiassaqartitsivik APF naapertorlugu taama ilisimatitsipput.
Tigusarineqartut tassaapput Østrigimiut marluk, Estlandimiut marluk kiisalu VM-imi marloriarluni bronzennassimasoq Kasakhstanimiu Aleksej Poltoranin.
Nakorsaatit sukasaatit pillugit nunani tamalaani suleqatigiit paasiniaaffigineqarnerat Tysklandimi politiit suleqatigalugit ingerlanneqartoq, politiit aamma ilisimatitsissutigaat.
Tusagassiorfiit arlallit videomik sisamanngormat saqqummiussaqarput, tassanilu tigusarineqartut ilaat, Østrigimiu Max Hauke, nakorsaammik sukasaammik talimigut imminut kapisoq takuneqarsinnaavoq.
Poltoranin Østrigimiullu allat marluk nakorsaammik sukasaammik atuisimallutik nassuerutigaat, tamarmillu iperagaareerput. Estlandimiut marluk sisamanngormat suli tigusaaqqapput.
