Ujajaasartut aningaasarpassuarnik akilerneqarsimasut
Somaliamiut imaani ujajaasartut arlallit, umiarsuarmik Koreami Kujallermiut uuliamik assartuutaannik "Sambo Dream"-imik, Indiap Imavittarsuani apriilimi tigusarinnittut, umiarsuup iperarnissaanut aningaasarpassuarnik akilerneqarsimapput.
- Isumaqatigiissitsiniartartut oqaluttuuppaannga, umiarsuup iperarnissaanut 9 millionit dollarsinik akiliisoqarnissaa isumaqatigiissutigineqartoq. Imaatigut ujajaasartunut aningaasanik aatsaat taama amerlatigisunik akiliisoqartoq uppernarsarsinnaavara, Andrew Mwangura, Afrikap kangiani immakkut angallannermut nakkutilliisuneersoq, Reutersimut taama oqarpoq.
Uuliamik assartuutip inuttai tassaasut, Korea Kujallermiut tallimat aamma qeqertani Filippinerineersut 19-it, tamarmik ajunngitsut oqaatigineqarpoq.
Somaliami ataatsimut isigalugu uivernersuaqarpoq, aammillu kuisinertaqaqisumik akersuuttoqartarluni. Nuna taanna ukiuni 20-nngulersuni atorsinnaasunik naalakkersuisoqanngilaq, sumilu tamaani sakkulersuuttoqarluni.
Nunami tamaani pissutsit kingunerannik, nunap sineriaata avataani imaani ujajaaniartarneq ileqquuleraluttuinnarpoq, tamannami umiarsuartigut Europap, Afrikap Aasiallu akornanni angallannermi aqqutinnaarineqarmat.
- Una tassaavoq iluanaarujussuarnissaq qangali utaqqisimasaat, umiarsuup iperarnissaanut akiliutit amerlanerpaat pillugit, Andrew Mwangura taama oqarpoq.
- Tamanna allanut imaatigut ujajaaniartartunut ilanngunnissamut imaluunniit ujajaaniartartunut sakkunik teknikikkullu atortorissaarutinik pilersuinissamut kajumissaataavoq, Andrew Mwangura taama mianersoqqusivoq.
