Ujaasineq taamaatiinnarpaat

Danskeq 21-nik ukiulik Kasper Sørensen Australiami qeqertat ilaanni Tasmaniami tammaaneqartoq qaqqami Cradle Mountainimi maanna ajunaarsimassangatinneqalerpoq, ujaasinerlu taamaatiinnarneqartoq politiit nalunaarput.

Tamaani nittaarujussuarnera pissutigalugu ujaasineq aamma ajornakusoorpoq.

- Aput aatsinnagu qanoq ilioriarsinnaanngikkallarpugut. Immaqa sapaatip akunneri arlallit – immaqaluunniit qaammatit arlallit – utaqqisariaqassaagut, politiinspektøri Brian Edmonds nutaarsiassaqartitsivimmut Ritzauimut oqarpoq. Kasper Sørensen ajunngitsoq kingullermik takuneqarpoq juulip ulluisa tallimaanni. Nammattagaa qaqqasiortartut ilaanit ullut tallimat qaangiummata nassaarineqarpoq, qaqqamut Cradle Mountainimut qaqiniartut qaqiliivinnerminni nassataminnik nalinginnaasumik inissiisarfianniittoq.

Angutip quaassimanissaa nakkarluniluunniit toqusimanissaa politiit ilimagaat. Nakkarsimassaguni 150 miiterinik ititigisumut nakkarsimassaaq.