Ujaasineq suli kinguneqanngilaq
Arkalo Wille pillugu politiit nassaatuaat tassaagallarpoq angallateeraq 16 fods. Taanna sapaatip akunnera kingulleq naalersoq nunaqarfiup Ilimanap saani nassaarineqarpoq. Umiatsiaaraq tillinneqarsimasutut nalunaarutigineqarsimasoq nassaarineqarnermini ajoqusersimavoq.
- Tamatuma kingorna nalunaaquttap akunneri pingasut ujaasineq angallat atorlugu ingerlakkaluarparput. Taassuma saniatigut qulimiguulimmik politiinik sisamanik issimasulimmik akunnerit arlallit ujarleraluarpugut. Sukumiisumik ujarleraluarnerput ajoraluartumik kinguneqanngilaq, Ilulissani politeeqarfimmi ulluinnarni aqutsisoq Karl Vinther KNR-imut taama oqarpoq.
Ujaasinerup nalaani silagissorsuusimagaluarpoq taamaattorli sikut anisimammata sikorpassuaqarluni.
- Suli neriuutigaarput innuttaasunit saaffigineqarumaarluta. Kisianni tassa uagut ujarlernerput unitsereerparput, Karl Vinther oqarpoq.
Ilulissani politiit oqarasuaatigaat 943222.
