Uiluinniarnermi killilersuisoqalerli
Elias G. Larsen oqarpoq, aalisartut uiluinniartuarnerisa immap naqqa allanngortikkiartulissagaat aarleqqutigisariaqartoq, taamaammallu illoqarfinni nunaqarfiillu eqqaanni uiluinniarneq killilerneqartariqartoq.
- Uiluinniarnermi immap naqqa kiliortorneqartarpoq, taamaalillunilu uiluiinnaanngitsut uumasulli aamma allat akornuserneqartarlutik. Aamma aalisakkat suffiffigisarpaat qeqqussallu sorlaniffigisarlugu. Taamaattumik nunaqarfiit illoqarfiillu qanittuini uiluinniarnerup killilersorneqarnissaa sulissutigineqartariaqarpoq, Elias G. Larsen oqarpoq.
Taanna isumaqarpoq, Sisimiut eqqaani 2000-ikkulli aallartinneranni uiluinniarneq, upernaaralaamiit ukiamut ingerlanneqartartoq, maannalu Sisimiut mittarfiata avatinnguani allaat ingerlanneqartoq, piujuartitsinissamik tunngaveqarsimanngitsoq.
- Ullumikkut aalisariaatsini assigiinngitsuni killilersuisoqarpoq, uiluinniarnerli isigineqangitsutut illuni, uffali uiluiit aalisakkanit allanit aamma nerisarineqartut. Aamma Sisimiuni umiatsiaararsorluni uiluinniartoqarpoq, taakkulu inuussutissarsiutimik ingerlannissaanut periarfissaqartariaqarput, taakkualu illersussagutsigik, taava iliuuseqartoqartariaqarpoq, Elias G. Larsen oqarpoq.
Aalisarnermut naalakkersuisoq, Finn Karlsen oqaaseqartinniaraluaratsigu iluatsinnglarput. Kisianni uiluinniarneq pillugu Pinngortitaleriffik 2004-mili inassuteqarnikuunngilaq.
