Uffartarfikoq peeqqunngilaat

Qaqortumi illutoqaq 1930-mi sananeqarsimasoq Igalikup ujaraanik taaneqartartunik qarmagaq peeriarlugu allamut nuunneqarsinnaanera tusarniaassutaavoq.

Pisiffiup Qaqortumi pisiniarfimmik allileriniarneranut atatillugu tusarniaasoqarpoq.

Pisiffiup saniani illutoqaq qanga uffartarfittut atorneqarsimasoq peeriarlugu allamut nuunneqarsinnaanera akuerineqarsinnaanersoq Kommune Kujalliup teknikkeqarfianiit paaserusunneqarpoq. Illutoqqalli peeriarlugu allamut nuunneqarnissaa akerleralugu atsiornernik katsersisoqarpoq.

-Pisiffik illoqarfimmi pisiniarfiit unammillernerannut iluaqutaaqimmat akerlilinngilarput. Illutoqarliuna eriagisassatut naqissusigaammat peeriarlugu allamut nuuneqarsinnaanera akerlerigipput, Qaqortormiut ilaat Olaf Kleist oqarpoq. Taassuma aamma tikkuarpaa kuup eqqaa tamarmi eriagisassatut allanngutsaaliugaanera. Maannamut innuttaasut 200-t akerliullutik atsioreersimalerput.

Pisiffik qummut kangimullu, imaluunniit uffarfikup tungaanut alliniarneqassanersoq pillugu kingusinnerusukkut aalajangertoqarumaartoq Pisiffimmi immikkoortortami pisortaq Søren Damgård oqarpoq.

Kommune Kujallermi teknikkimut ataatsimiitsitaliaq pineqartoq pillugu sapaatip akunnerata tulliani aalajangiussaqassasoq ataatsimiitsitaliap siulittaasua Kaj Egede ilisimatitsivoq.

Uffarfitoqaq ingitserlugu nuunneqassaguni kuup akianut, iffiorfiup eqqaanut imaluunniit saffiorfiup eqqaanut nuunneqassanersoq tusarniarneqassaaq.