Nunatsinni qinersineq nunatta avataani tusagassiorfinnit ukioq manna soqutigineqannginneruvoq
Danmarks Radio, TV2, Radio24Syv, Berlingske. Qallunaat tusagassiuutaat tallimanngornermi qinersinissamik sammisaqartut amerlaqaat. Nunatta karsia, aatsitassarsiornissarsuaraluarlu qatangiinnartoq ukkatarineqarnerupput - soorlu TV2'p sammisaqarnerani, tv-qarfiup pisortarigallagaa Hans Peter Blicher oqaluttuarpoq.
- Sulisut aallartitatta aallakaatitassiani suliareriigaanni aningaasaqarneq sammineqarneruvoq. Takusinnaangatsigu qinersinissaq una aningaasaqarnermut tunngasoq. Aammali aatsitassarsiorneq siornatigut sammineqarsimasoq- taannaasimagaluarpormi ajornartorsiutinik tamanik aaqqiisussatut isigineqarsimasoq. Kuannersuilli suli nikisinneqanngillat, aatsitassarsiortoqalersimanngilarlu.
Aammattaaq aalisarneq, aammalu innuttaasut politikerillu akornanni pissutsit sammisimavagut.
- Politikerit innuttaasullu akornanni tatiginnikkunnaarneq. Tamakkuuppummi maanaannaq qinersisoqarnissaanut pissutaasut. Tassa innuttaasut akornanni kamanneqarmat.
Allamiut tusagassiorfii malinnaapput
Nunani allani tusagassiuutit saqqaminniititsinissaminnut 2013-imisut pileritiginngillat. BBC-mut tuluillu aviisiiannut The Daily Telegraphimut ilanngutassiortoq Danmarkimiit sullissisoq Julian Isherwood oqaluttuarpoq.
- Qinersinerup siulianut naleqqiullugu soqutiginninneq maanna annikinneroqaaq. Qinersinerup siuliani Danmarkimiit avissaarnissaq eqqartorneqaqaaq, tamannalu aatsitassarsiornermik toqqaveqassasoq. Maannakkut tamakku sammineqarpallaanngillat. Taamaallaat uranimut apeqqut piffissami kingullermi qaqinneqartoq.
Kangiamiut aamma malinnaapput
Nunatta Københavnimi sinniisoqarfiani aamma nunani allamiut tusagassiuutaat sammineqartarput, nunarpullu pillugu tusagassiortunut paasititsiniaaqataasarlutik. Ingammik kangiamiut tusagassiortui suli nunatsinnut soqutiginnttorujussuupput. Allaanerulaartumilli ukkataqarlutik, paasissutissiisartoq Susan Frydendal oqaluttuarpoq:
- Kina eqqarsaatigigaanni Nunatsinnut soqutiginninneranut pissutaasoq tassaavoq Issittumi Siunnersuisooqatigiinni peqataarusunneq, aammali aatsitassarsiorneq pingaarnertut soqutigineqarpoq. Japanimiunut aalisarneq soqutiginarneruvoq, aammali Kinap Nunatsinni soqutigisai qissimigaarlugit. Nunat taakku imminnut alapernaalaartaramik.
