Danskit ilinniartitaanermut ilisimatusarnermullu ministeriata Eskimologi attatiinnarusuppaa
Ministeri Danmarkimi partiit naalakkersuisuutitaqartut iliniartitaanermut oqaaseqartui peqatigalugit aviisimi Jylandspostenimi isornartorsiuinertik allaaseraat.
Københavnip Universitetiata nalunaarutigaa, sipaarniarneq eqqarsaatigalugu ilinniartunik nutaanik aasamut tigusinissaq unitsinneqassasoq, taakkununnga ilaalluni Eskimologimut ilinniarneq.
Partiit naalakkersuisuutitaqartut, aningaasaqarnermut inatsimmut tapersuisut isumaqarput, ilinniarfiit ikittunit ilinniartoqartartut taakkununnga ilaalluni Eskimologi immikkut 1,25 million koruuninik ukiumut tapiiffigineqartartut.
- Qularutigineqarsinnaanngilaq Universitetimi ilinniagaq Eskimologi naalagaaffeqatigiinnitsinnut aamma issittoq pillugu paasisimasaqarnissatsinnut pingaaruteqartuusoq, politikerit aviisimi allaaserisaminni taama tikkuagaqarput.
Taakkua aamma isumaqarput eqqarsaatigineqartariaqartoq, ilinniarfinnut ikittunit ilinniarfigineqartunut qassit ilinniartinneqarnissaat pisariaqartinneqarnersut taakkununnga ilaalluni Eskimologi.
Aamma atuaruk Københavns Universitet: Ilinniartukitsumik ingerlatsineq akisuvoq
Aamma atuaruk Partii Naleraq: Eskimologi maaniissaaq
Inatsisartuni ilaasortat nunatsinniillu Folketingemut ilaasortat, GE-llu Eskimologiimik ilinniarsinnaanerup matusinnaanera isornartorsiornikuuaat.
Aviisimi allaatigisami ministeri, Venstrep, Dansk Folkepartip, De Konservativep Liberal Alliancellu ilinniartitaanermut ilisimatusarnermullu oqaaseqartartui allattuupput.
