Ualimut marlunut qinersiartortut
Qinersivinni suli taasivissanik agguaapput, arfineq pingasullu tungaanut ingerlassallutik. Naliliigallarnerit naapertorlugit qinersiartortoqangaatsiassagunarpoq.
Nunatsinni naatsorsueqqissaartarfimmiit kisitsisit takutippaat Nunatsinni qinersisinnaasut 2005-imi qinersinermut naleqqiullugit ullumi 123-nik amerleriarsimasut. Nunaqarfinnut illoqarfinnullu paasiniaanerput malillugu kingullermik qinersinermut naleqqiullugu qinersisut maanna amerlanerussagunarput.
Nalunaaqutaq marlunut Tasiilami qinersisinnaasut 25,45 procentii qinersiartorsimapput, 2005-imi taamaalinerani 22,04 procentii qinersiartorsimallutik.
Aamma Nunatsinni illoqarfiit annersaata tulliani, Sisimiuni qinersiartorsimasut 2005-imut sanilliullugu qinersiartortoqarnerulaarsimavoq, qinersisinnaaasut 28,40 procentii qinersiartorsimallutik, 2005-imi nalunaaqutaq marlunut 26,68 procentii qinersiartorsimallutik.
Nunatsini nunaqarfiit annersaasa ilaanni, Kangaamiuni nalunaaqutaq marlunut inuit 95-it qinersiartorsimapput, 2005-imi taamaalinerani 160-it qinersiartorsimagaluartut qinersiartorsimasut procentinngorlugu 36,14-nut appariarsimavoq.
Qaqortumi nalunaaqutaq marlunngortinnagu kingullermiit qinersisut amerlanerulaarsimapput, qinersisinnaasut 38 procentii qinersiartorsimallutik, kingullermik taamaalinerani 37,5 procentit qinersiartorsimallutik.
Ataatsimut isigalugu kingullermik Folketingimut qinersinermiit amerlanerusut, partiinit sisamaniit qinigassanngortittut 16-it, qinerneqariartorsimapput.
Apeqqutit soqutiginarnerit ilagaat Atlantikup Avannaani Suleqatigiit ingerlaqqissinnaassanersut, kalaallillu qinigaasut Danmarkimi kikkut naalakkersuisuutitaqalernissaannut sunniuteqartussangussanersut.
Illit aamma Folketingimut qinersinermi inernerugallartut KNR-ip nittartagaani, knr.gl-imi KNR-illu tekst-tv-ani malinnaaffigisinnaavatit, unnugulu nalunaaqutaq 21,25, qulinut tanneq tallimat knr-tv toqqaannartumik kalaallisut qallunaatullu aallakaatitsilissaaq.