Tûgdliup meerartai siammartitersimapput

Ulloq unnuarlu paaqqinnittarfimmi tassani pissutsit isornartorujussuunerat pissutaallutik paaqqinnittarfik upernaaq matuneqarpoq, nukappiaqqallu 21-t Tûgdlimmi taamanikkut inissinneqarsimasut allamut inissinneqartariaqarlutik.

Nukappiaqqat angutillu inuusuttut taakku immikkut ittumik inissinneqartussatut nalilerneqarsimasuupput, Tûgdlimmilu allatut ajornartumik ilaatigut inissineqartariaqarsimasuullutik.

Taakkunannga nukappiaqqat arfinillit illoqarfinni allani paaqqinnittarfinnut inissinneqarnikuupput, ataaserlu Danmarkimi inissinneqarsimalluni.
Nukappiaraq taanna Qaasuitsup Kommunianeersuuvoq, Nunatsinniiginnarsimasinnaaneralu Qaasuitsup Kommuniata neriuutigisimagaluarpaa.
Qaasuitsup Kommuniani inunnik isumaginninnermut immikkoortortaqarfimmi pisortaq Magga Fencker taama oqarpoq, nukappiararlu taanna ajunngitsoq oqaatigalugu.

Nukappiaqqat allat marluk ilaqutariinnut inissinneqarnikkuupput, ataaserlu angajoqqaaminut uternikuulluni.
Kommunininngaanniit taama ilisimatitsisoqarpoq.

Inissinneqarsimasut taakkua pillugit suliassanik isumaginninneq ingerlalluarsimasoq, Qaasuitsup Kommuniata Kommune Kujalliullu oqaatigaat. Nukappiaqqanik inissiinermi ilaatigut ajornartorsiortoqartarsimasoq, kommunit taakku marluk ilisimatitsissutigaat.

Nukappiaqqat Tûgdlimmi inissinneqarsimasut 21-t akornanni aqqaneq-marluk Kommuneqarfik Sermersuumeersuupput.
Ilaqutariinnullu Meeqqanullu immikkoortortaqarfiup pisortaa, Mette Sonniks, ima oqarpoq:

- Ajornartorsiut aaqqiivigaarput, Namminersorlutillu Oqartussat ulloq unnuarlu paaqqinnittarfiit pillugit immikkoortortaqarfia matumani suleqatigilluarpavut. Nukappiaqqalli immikkut ittumik inissinneqartussat pillugit maanna ajornartorsiuteqarpugut. Nukappiaqqat Tûgdlimmi taamanikkut inissinneqarsimasut matumani pineqanngillat, nukappiaqqalli allat pineqarlutik, Mette Sonniks, Kommuneqarfik Sermersuumi Ilaqutariinnut Meeqqanullu immikkoortortaqarfimmi pisortaq oqarpoq.

Qaasuitsup Kommuniani inunnik isumaginninnermut immikkoortortaqarfimmi pisortaq Magga Fencker oqarpoq, taamanikkut Ilulissat Kommuniugallarmat nukappiaqqat allatut ajornartumik Tûgdlimmut inissinneqartariaqarsimasut, Namminersorlutik Oqartussat ataanni ulloq unnuarlu paaqqinnittarfinni inissat amigaataammata.

Kommune Kujallermi inunnik isumaginninnermut siunnersorti Kathrine Berthelsen assingusumik oqarpoq, soorlu aamma Mette Sonniks taama oqartoq:

- Immikkut ittumik inissinneqartariaqartunut Tûgdlik tulluartuummat nukappiaqqat tassunga inissinneqarput, oqaatigisariaqarparali immikkut ittumik inissiinermi malittarisassanik kommunini amigaateqartugut, Mette Sonniks, Kommuneqarfik Sermersuumi Ilaqutariinnut Meeqqanullu Immikkoortortaqarfimmi pisortaq, oqarpoq.