Tysklandimi katuullit atornerluisarsimanerat qulaajarneqarput
Mamianartuliaq sapaatit akunneri pingasut qaangiuttulli sammineqarluni aallartimmalli, atornerlunneqartarsimallutik nalunaartut 115-iupput.
Canisiusimi Berlinimi taamanikkut katuullini mattuttoqatigiinni jesuitsini ilinniartut ilinniarnertuunngorniarfimmiissimasut ukiuni qulikkuutaani nipangersimareerlutik maanna oqaluttuartalerput 1970-ikkunni 1980-ikkunnilu ilinniartitsisuminnit jesuitsiusunit kinguaassiuutimikkut atornerlunneqartarsimallutik, nakuuserfigineqartarlutik nikanarsagaasarlutillu.
Taamatut nassuertoqareersorlu Tysklandimi jesuitsit atuarfiinut allanut atornerluisoqartarsimaneranik pasilliineq siaruaappoq, paasinarsillunilu ilumoortortaqartoq.
- Manna tikillugu upperisimanngilluinnagarput sunaaffaana taama annertutigisoq, inatsisileritooq Ursula Raue mattuttoqatigiinni jesuitsini mamianartuliornermik misissuisussanngortinneqarsimasoq oqarpoq.
Taanna siornatigut meeqqanik ikiuiniaqatigiinni siuttuusimavoq maannalu tassa atornerluisarnermik kanngunartuliaq pillugu nalunaarusiarigallakkani saqqummiullugu. Taanna oqarpoq atornerlunneqarsimasutut nalunaartut akornanni aammattaaq nalunaartut tassaasut atuarfinni jesuitsit ingerlatarinngisaanni allani atuartut, kiisalu angajoqqaat allallu isiginnittuusarsimasut.