Tysklandimi ileqqaaruteqarnissaq annerpaaq
Kansler Angela Merkelip pilersaarut ullaap tungaani tamanut saqqummiuppaa, pilersaarullu amerlaqisut ilimagisaanninngarnit suli annertunerulluni.
Koruunit 600 milliardit. Tysklandimi naalagaaffiup aningaasaqarnerani missingersuutit ukiuni tulliuttuni sisamani taama amerlatigisunik ikilineqassapput. Tysklandip pisortaata arnap taassumalu naalakkersuisoqataasa ullumi tamanna nalunaarutigaat. Partiit naalakkersuisuutitaqartut taakkua marluusut ileqqaarniutissatut pilersaarutit naammassiniarlugit ulluni marlunni ataatsimiipput, ileqqaarutissallu ilimagisamit suli amerlanerusut angusarineqarlutik.
Tamanut atuuttumik akileraarutit qaffanneqassanngimmata ilinniartitaanermilu allanik ileqqaaruteqartoqassanngimmat tyskit nuannaarutigisinnaavaat. Nerisassat momsilerneqartarnerat aammattaaq eqqorneqanngilaq, suliassaqarfippassuilli allat amerlaqisut eqqorneqassallutik.
Sivisuumik suliffissaaleqisut ilaqutariillu meerartallit eqqorneqassapput, inuussutissarsiuteqartunut tapiissutigineqartartut ikilisinneqassapput aningaasanik nioqquteqarneq akileraarusiiffigineqassaaq, nukissiorfissuillu atomimik atortoqarnerminnut akileraaruteqartinneqalissallutik. Sulisoqarnermi politikki allanngortinneqassaaq, Tysklandillu illersornissamut ministeriata ileqqaarniuteqarnerujussuarmut atatillugu Tysklandimi sakkutooqarneq annertuumik misissuiffigissallugu, maannakkullu sakkutuunit 260.000-iusunit 40.000-it suliffitsik annaaratarsinnaallugu.
Aammattaaq timmisartunut tunngasumik suliffissuaqarneq nutaamik akitsuutitigut eqqorneqassaaq, pisortanilu sulisut ikinnerpaamik 10.000-iusut suliffitsik annaassallugu.
Tysklandimi naalagaaffiup aningaasaataanni siorna nunami tamarmi tunisassiat 1 procentiat amigartoorutaavoq, taamaallaallu 3 procentit EU-p piumasaqaatai sinnilaaginnarsimallugit. Tysklandimili naalakkersuisut ukiormanna 5 procentinik amigartooruteqarnissaq ilimagaat.
Kansler Angela Merkel oqarpoq, ileqqarniuteqarnissarsuarmi allatut qinigassaqarsimanngitsoq. Ukiut atukkat imaannaanngeqaat, ukiullu atukkat ajornakusooqalutik. Kissaatigisavut tamaasa pisinnaanngilavut, siunissarput aamma eqqarsaatigissagutsigu, taama oqarpoq.
