Tysklandimi atuakkanik nittarsaassinermi kalaallit peqataasut
Kalaaleq atuakkiortoq Sørine Steenholdt saqqummersitsinermi peqatassaaq, soorlu aamma Julie Kondrup, saqqummersitsisarfimmit Milik Publishingimeersoq, peqataassasoq.
Kalaallit Atuakkiortut suliniutaat GreenLit, Frankfurt am Mainimi saqqummersitsinersuarmi nunatsinni atuakkanik saqqummersitsisarfinnit atuakkat saqqummersinneqarsimasut ilaasa ilisaritinneqarneri tassani ilaallutik.
Nunatsinni atuakkialerinermut allaffeqalernissaq, taannalu aqqutigalugu atuakkiat nunatsinni nunanilu allani nittarsaanneqarnerullutillu soqutigineqarnerulernissaat GreenLitimi suliniutaavoq.
Kalaallit Atuakkiortut siulittaasuat Juaaka Lyberth tusagassiutinut taama allaaserisaqarpoq.
Nunatsinnit Frankfurt Book Fairimut peqataaasut atuagaaqqiannguaq "Books from Greenland 2018" nassarpaat, atuakkat nunatsinni atuakkanik saqqummersitsisartut peqatigalugit suliaapput.
Atuakkat "Books from Greenland 2018"-imi ilisaritinneqartut tassaapput atuakkiat meeqqanoortut, inuusuttunoortut, eqqaamasalikkersaarutit, oqaluttualiat pissanganartut ersinartullu kiisalu taalliat.
Nunatsinni atuakkiat, naatsumik tuluttoortumik ilisaritinnerisigut, nunani allamiunit ilisimaneqarnerulernissaat, allamiullu oqaasii atorlugit saqqummersinneqarsinnaanerisa aqqutissiuunneqarnissaa, GreenLit aqqutigalugu nittarsaassinerup siunertaraa.
Atuagaaqqiaq "Books from Greenland 2018", GreenLitillu Frankfurtimi nittarsaassinersuarmi peqataatitaqarnissaa, Tips- og Lottomidlerne aqqutigalugit aningaasaateqarfimmit tapiiffigineqarpoq.
