Tysklandimi aanngajaarniutinut inatsit sakkukilleqquneqarpoq
Tysklandimi professorit 100-it sinneqartut nunami politikerinut inassuteqarlutik allangaqarsimapput.
Professorit siunnersuutigaat Tysklandimi aanngajaarniutinut inatsisit sakkukilliseqqullugit.
Illoqarfiit pingaarnersaanni Berlinimi "coffeshop"inik taasartagaat siulleq ammassamaalerpoq; tassani hashimik qanorsuaq pujortartoqarsinnaavoq.
Inunnik allanik ajoqusiinngikkunik, innuttaasut naliginnaat aanngajaarniutinik atuisinnaatitaapput. Professorit 100-it sinneqartut pinerluutillit suliarineqartarnerannut professoriusut nalunaajaammi tyskit inatsisartuinut tunniuteqqammisaminni allapput.
Tamatuma kingunerisariaqarpaa Tysklandip hashi pillugu inatsisiminik sakkukilliliineranik, pinerluutit suliarineqartarnerannut immikkut ilisimasalik Lorentz Böllinger Bremenip Universitetianeersoq oqarpoq.
USA-mi Uruguaymilu ilisimatusarsimanerit misissoqqissaaratsigit qularunnaarsippaatigut inatsit aamma Tyslandimi allanngortittariaqartoq.
Naalagaaffiummi atuisartut illersorsinnaanngilai; ingammik inuusuttut; hashi pinerluttuliortut akornanni tuniniangaatillugu. Inerteqqutaajunnaarpat, naalagaaffik paasititsiniaanissaminut periarfissaqarnerulissaaq, soorlu navianarnera pillugu, pitsaassusaata nassiussorneqartarneratalu nakkutiginissaa aamma ajornannginnerulissasoq, Lorentz Böllinger erseqqissaavoq.
Nalunaajaat tyskinit professorinit 100neersoq aanngajaarniutit pillugit oqallinnerup annertusingaluttuinnartup ilagiinnarpaa, tamakkulu pillugit pinerluttuliornernut akiuiniaraluarnernut iluatsinngisaannartunut. Berlinimilu ajornartorsiut iliuuseqarfiginiarlugu misiliutigalugu Tysklandip "coffee-shopi" siulleq ammalerpaa, inatsisinik unioqqutitsinani hashimik pisillunilu pujortarfigineqarsinnaasoq.
