Tyskland nunarsuarmi pissartanngorpoq
Nunarsuaq tamakkerlugu isikkamik arsarnermi pissartanngorniuttoqarnerani Tyskland ippassaq unnukkut ajugaavoq. Tyskit arsaqatigiillaqqissuseqarluinnarnermikkut pissartanngorniunnermi ingerlallualaavissorput Argentinamullu ippassaq ajugaallutik.
Allattoq Niels Krogh Søndergaard, Simon Uldum
juulip 14-at 2014 03:57
Minutsini 90-ini pissanganartumik, ajuuffiunngitsumilli, unammisoqareersoq Argentinamiut Tyslandimiullu pissartanngorniutivinnerat sivitsorneqarpoq.
Sivitsuinerullu naammassinissaanut minutsit arfiniliinnanngortut tyskit saassussipiloormata Mario Götzep arsaq sakissaminik unitseriarlugu sakkortuumik aqippaa unammermilu kisiartaasumik kusanarluinnartumilli ajuulluni.
Riomi arsaattarfimmi pissartanngorniutivittoqarnera isiginnaarianit 80.000-init malittarineqarpoq Berlinimilu Brandenburger Torimi tyskit malinnaasut 200.000-it Argentinamut ajugaangamik nuannattorsuupput "Deutschland ist Weltmeister"-ilu erinasorlugu.
