Tyskeq Japanimiorlu toqutaasunut ilaapput

Tyskeq japanimiorlu Myanmarimi sakkutuut saassussimmata toqutaapput.

Myanmarimi siornatigut Burma-simasumi sakkutuut kisermaassillutik ukiorpassuarni naalakkersuisuusimasut, akerliussutsimik takutitsisunut 70.000-inut ullaaq sakkulersornerat alianartumik kinguneqarpoq, allaallu tutsiuttoqartalerpoq sakkutuunngooq qinusarfinni mattuffinnilu tillinnialersimasut.

Myanmarip sakkutooqarfiata Japanimiut Yangonimi aallartitaqarfiannut nalunaarutigaa Japanimiu ataaseq toqutaasoq. Napparsimmaviillu ilaannit nalunaarutigineqarpoq tyskeq ataaseq aallaaneqarluni aamma toqutaasoq, Ritzau taama nalunaaruteqarpoq.

Japanip erngerluni Myanmarip Tokyomi ambassadøria peqquaa toqutsinermut akerlioqqullugu.

Myanmarimi eqqissiviilliornerni allat arfineq-pingasut ajunaarsimasut oqaatigineqarput.

Tigusat mattuttut innuttaasullu allat maanna 700-nngorsimasut naalakkersuisunut illuatungiliuttut aamma nalunaarutigaat.

EU innuttaasut ulorianartorsiortinneqarnerat pillugu maanna suleqatigiissitaliorpoq, Myanmarimik killilersuinissamut tunngasunik suliaqartussanik.