Tyskit Fridtjof Nansenip aqqutigisimasaa aqqutigileraat
Umiarsuaq Polarstern 120 meterinik takissusilik Sibiriamiit Qalasersuakkut sikumi sarfaatitissaaq imaq Kalaallit Nunaata Svalbardillu akornanniittoq ornillugu.
Siornatigut taama iliortoqareersimavoq norgemiu issittumi ilisimasassarsiortartoq Fridtjof Nansen 1800-kut naalerneranni tamaanaqqummat. Taamani ilisimassassarsiorneq ukiunik pingasunik sivisussuseqarpoq.
Matumuunali umiarsuaq ilisimatusarnissamut sanaaq nutaaliaanerpaaq sikumut sarfaatsitissaaq. Naatsorsuutigineqarpoq angalaneq taamaallaat ukiumik ataatsimik sivisussuseqassasoq, BBC allaaserisaqarpoq.
Professor Markus Rex angalanermi aqutsisuussaaq.
Taanna oqarpoq angallavissaanni silap pissusaata allanngoriartornera annerpaasoq. Nunarsuaq tamakkerlugu eqqarsaatigalugu agguaqatigiisillugu angallavissaanni marloriaammik kiatsinnerusimavoq.
Umiarsuaq atortorissaarutinik uuttortaasinnaasunik ulikkaartoq, Markus Rex oqaluttuarpoq.
- Imeq, siku silaannarlu aqqutaani uuttortagassanik tigusiffigineqartassapput. Umiarsuup aqqutaani aammalu 20-niit 30 kilometerit angullugit, Markus Rex Danmarks Radiomut oqarpoq.