Tyrkiet-imi naalakkersuisut ajornartorsiorput
Tyrkiami naalakkersuisut suli ajornartorsiorput maannalu naalakkersuisut siulittaasuata Tayyip Erdogan-ip piffissaanngitsukkut qinersisoqarnissaa kissaatigaa – tamannalu piaartumik pissasoq,
aammattaaq præsidentimut qinersisarnermut inatsisip allanngortinneqarnissaa siunnersuutigaa.
Tyrkiami naalakkersuisut siulittaasuata partiimi upperisarsiortuusup, AK-p, illuatungiliuttullu aaqqiagiinnginnerat inatsisartunut qinersititsinikkut qaangerniarniarpaa.
Qinersineq pissaaq juunip 24-anni, ullorlu taanna pisinnaanngippat kingusinnerpaamik juulip aallaqqaataani pissalluni.
Ajornartorsiornerup qiteraa Tyrkia nutaamik præsidentertaartariaqarmat. Præsidentilu inatsisartunit qinerneqartarpoq.
Partii naalakkersuisuutitaqartoq, tassa upperisarsiornermik pingaartitsisoq ingaasaassinianngitsoq AK partii, kisimiilluni præsidentimik qinigassanngortitsiniarpoq. Sassartinniagaallu tassaavoq maanna nunanut allanut ministeriusoq Abdullah Gül.
Nunap qanoq naalakkersorneqarneranut inatsisaanullu eqqartuussiviup nalunaarutigaa, præsidentimut qinersinermi inatsisartut 2/3-ii najuutissasut. Inatsisartunilu ilaasortat taama amerlatigisut partip AK-p ilaasortaatitarinngilai, taamaattumillu illuatungiliuttut taasisoqalerpat takkutinngitsoornermikkut qinersineq ajalusoortissinnaavaat.
Taamaattorli illuatungiliuttut ilinniarluarsimasuusut taamaaliornissaat ilimagineqanngilaq. Taakkumi isumaqarput Gül-ip islamisiornermik ingerlatsinermigut Tyrkiamiut upperisarsiornerup tungaanut ingerlannialissagai.
Naalakkersuisut siulittaasuata Erdoganip qinersinissap siuartinneratigut anguniarpaa partiimi muslimiusup ingasaassinianngitsup partit upperisarsiortuunngitsut ajugaaffigisinnaassagai. Tassami isumasiuinerit kingulliit ersersimmassuk qinersinermi AK ajugaasinnaassasoq.
Qinersinerup ullussaa ullumikkut nalunaarutigineqassasoq naatsorsuutigineqarpoq, ilimagineqarlunili juunip naalernerani juulilluunniit aallartilaarnerani pissasoq.
Erdoganip aamma siunnersuutigaa præsidenti innuttaasunit toqqaannartumik qinerneqartalissasoq, maannakkutut inatsisartunit qinerneqarani.
