Tyrkiap Irak aningaasatigut pillarniarlugu qunusaarpaa

Pkk-p sapaatiummat Tyrkiamiut sakkutuui aqqaneq marluk toquppaat arfineq pingasullu qimarngullugit.

PKK-miilli saassusseqattaaginnarpata Tyrkiap naalakkersuisunut siulittaasuata, Tayyip Erdoganip Irak aningaasatigut pillarniarlugu qunusaarpaa.

Ali Baba Khan, Tyrkiami nunanut allanut naalakkersuisuuvoq, Tyrkiallu Irakip avannaani PKK-meersunik saassussinissaanut akerliulluni. Taamaammat Tyrkiap innutai, naalakkersuisui, sakkutuullu Irakimut isaalluni PKK-meersunik saassusseqqusigaluartut, Irakimiut nammineq PKK-meersunik unitsitsiniarnissaat ornigineruaa. Tyrkiamiit, EU-miit USA-miillu PKK-meersut ajortumeeriniaanerarneqarnikuupput. Aappaatigulli Tyrkiamiut Irakip avannaanut saassussigaluarunik kingunerisinnaasai aarleqqutigaat, taamaamallu Irakip nunanut allanut naalakkersuisuanik, Hoshar Sibaari-mik, nammineq Irakimi Kurderinik naggueqateqartumik, naapeqateqarsinnaanertik naammagiinnarallarpaat.

- Akuerisinnaanngilarput kikkulluunniit, aamma PKK-meersuniit nunanut allanut atassuteqarnitta ajortisarneqarnissaat, Tyrkialu neriorsorlugu PKK-p unitsinniarnissaanut ikiuunniarlutik, Irakip nunanut allanut naalakkersuisua oqarpoq. Ilaatigullu aamma oqaatigalugu Irakip avannaani PKK-meersut sakkutooqarfimminniit nikeriartinnaveersaartinnissaat isumaginiarlugu, aningaasatigullu PKK-meersut ikiorsiivigineqartarnerat aamma unitsinniarniarlugu. PKK-meersut ukiorpassuarni Tyrkiamiit Kurdereqarfiup avissaarluni namminersulernissaa sorsuutigiuarsimavaat. PKK-meersut sakkuaakkunnaarusullutik nalunaaraluartut Tyrkiamiut akipput ajortumeeriniat sakkuaakkunnaaqatiginiarlugit isumaqatigiissuteqarfigineqarsinnaanngitsut. Tyrkiamili naalakersuisut siulittaasuat Londonimiit nalunaarpoq, nioqqutissat Irakiliaassassat Tyrkiakkoortarmata pillaatiginiarsinnaallugit, iliuuserisinnaasaminik sillimmateqarnini Irakimiunut tusaaqqusaarutigigunarlugu.