Tyrkiamut feriarnissaq kaammattuutiginngilaat
"Tyrkia nuna isumannaatsuunngilaq – takornariat Tyrkialiaasariaqanngillat.”
Kurderit Kiffaanngissuseqarniat, Kurdistans FrihedsFalke, taama erseqqitsigisumik mianersoqqusipput.
Tyrkiami illoqarfinni Antalyami Marmarisimilu ulloq unnuarlu kingulleq tallimariarluni qaartartumeerisoqarpoq, taakkunanngalu sisamat kurderit pineqartut akisussaaffiginerarpaat.
Antalyami ippassaq qaartartumeerinermi pingasut toqutaapput 20-t ikiligaallutik, taakkunannga qulingiluat takornariaallutik.
Tikeraat takornariallu annilaarsarniarlugit qaartartumeerisoqartartoq ilimatsaanneqarpoq, takornarianit Tyrkiap milliarderpassuarnik aningaasarsiornerujussua nunamut imminut pingaaruteqaqisoq ajoquserniarlugu.
Tyrkiami tamarmi sillimaniarneq oqartussaasunit sukaterneqarujussuarpoq.
Tyrkiamut angalassagaanni peqqarniisaartoqariataarnissaa Danmarkimi nunanut allanut ministereqarfiup sillimaffigeqquvaa, naak danskinik takornarnianik ulluni kingullerni qaartartumeerinerni suli ajutoortoqanngikkaluartoq.
