Tyrkiami uppititseriaraluartut parnaarunneqarput
Admiralit sisamat, generali oberstillu marluk, taakkua ilaat soraarninngorsimasut, eqqartuussivilersuunneqarnissartik ilimagisinnaavaat allakkami unnerluutiginnissummi allassimassammat taakkua peqqarniisaarnianut attuumassuteqarsimasut pissaanerlu atorlugu naalakkersuisunik uppititseriarnissamik pilersaaruteqarsimasut. Arfinillit allat iperagaapput unnerluutigisassanngortinneqarnissartilli ilimagisinnaallugu, DR taama tusagassiivoq.
Tigusarineqartunit nuimanerpaat ilagaat siornatigut illersornissamut ministeriusimasoq aammalu sakkutuunut imarsiortunut timmisartortartunullu pisortaasimasoq, taannalu suli killisiorneqarluni. Sakkutuuni pisortat 50-it missaanniittut ukiut arlallit qaangiuttulli Erduanip islamisiortumik naalakkersuineranik uppititseriarnissamut pilersaarusioqataasimasutut ippassaani tigusarineqarput. Tigusarinninneq manna tikillugu Erduanip naalakkersuisuunerani ilungersunarnerpaatut isigineqarpoq, Tyrkiami naalagaaffiup ingerlanneqarnerata sakkutooqarnerup upperisarsiornermit sunnersimaneqannginnissaata qulakkeerniarneqarnerani ukiullu kingulliit 50-it qaangiunneranni sisamariarluni naalakkersuisunik uppititsisarsimanerni. Ikittuinnaat isumaqaraluarput ullumikkut Tyrkiami EU-mut ilaasortanngornissaminik neriuuteqartumi sakkutuut suli taamaalioqqissinnaasut, kisiannili sakkutuut naalagaasa iliuuseqaqqinnissaat annilaanngatigineqarluni, tusagassiorfiit taama allapput. Sakkutuut naalagaat naatsuinnarmik nalunaaruteqarput pisoq imaannaanngitsoq pillugu ataatsimiissimallutik. Tyrkia pillugu immikkut ilisimasalik Timothy Ash tusagassiorfimmut Reuterimut oqarpoq naalakkersuisut sakkutuunik misissuinissaminnut pisussaatinneqartut EU-mut takutinniarlugu tamanna inuinnarnit nakkutigineqassasoq, tigusarinninnerilli arlaqarnerusut pissanganartorsiortitsinermik annerusumik oqimaaqatigiinnginnermillu pilersitsissasut.
