Tyrkia eqqartuussivilersuunneqalerpoq
Nahid Obusip arnaa Nahidip uianit aallaaneqarpoq arnat taakkua marluk sivisuumik nakuuserfigineqarnermik kingorna arlaleriarlutillu toqoriarneqartareerlutik isumannaatsumut piniarlutik illoqarfimmut allamut qimaaniarneranni. Ningaajusup ilaatigut nulii savimmik kapisimavaa arnallu taakkua marluk biiliminik aporsimallugit.
Biilit atorlugit toqutseriarnerminut qaammatini pingasuni parnaarussaasussanngorpoq koruuninillu tuusinterpaalunnik pillaammik akiligassinneqarluni.
Nahid Obus arnilu Tyrkiami oqartussaasunut arlaleriarlutik saaffiginnittarsimagaluarput oqaluttuartarlutillu inuunertik navianartorsiortinneqartoq Nahidillu uianut illersorneqarnissaminnik ikinnerpaamik 1998-ip 2002-llu akornanni sisamariarlutik qinnuteqartarsimagaluarlutik, anaanaasullu aallaaneqarnissaa qaammammik ataatsimik sioqqullugu illersorneqarnissartik kimigiiserlutik qinnutigisarsimagaluarpaat iluatsitsinatilli.
Angut sakiminik arnamik aallaallugu toqutsinerminut inuunini tamaat parnaarussassanngorlugu eqqartuunneqarpoq, eqqartuussutilli ingerlateqqinnissaata utaqqinerani iperagaalluni, tassami Tyrkiami oqartussaasut isumaqarmata ilaquttami ataqqinaatissaat illersorniarlugu toqutsisimassasoq. Paniusoq inuit pisinnaatitaaffii pillugit eqqartuussiviliarpoq, maannalu tassa eqqartuussivik taanna siullermeerluni nunamik eqqartuussivoq innuttaminik naammattumik illersuisimannginnermut.
Tyrkia aammattaa pisuutinneqarpoq inuit pisinnaatitaaffii pillugit inatsimmi paragraffimik unioqqutitsisimasutut, tassalu anniartitsinerup inerteqqutaaneranut kiisalu inuillu iliuuseqarfiginerannut tunngasumik immikkoortitsinermillu imalimmik. Tyrkia Nahid Obusimut taassuma arnaata toqutaaneranut 270.000 kr.-it missaannik taarsiilluni akiliisussanngorlugu eqqartuunneqarpoq.
Taamatut oqaluttuarpoq Randi Isager. Tyrkiami arnat affaasa missaanniittut angerlarsimaffimmi nakuuserfigineqartarput, ukiullu tamaasa aqqaneq-marluk ataqqinninneq pissutigalugu toqutsinermik taaneqartartumik toqutaasartutut pasineqartartut Amnesty Internationalimit oqaatigineqarluni.
