Twitter Trumpip saqqummiussaanik siullerpaamik erseqqissaassuteqartoq
Inuit internetikkut attaveqaqatigiittarfiat Twitter USA-p præsidentiata Donald Trumpip Twitterikkut ikkussaanik siullerpaamik erseqqissaassuteqarpoq, ikkussaalu putusaarutaasutut taallugu.
Allakkatigut taasinerit qinersinermi peqquserluttuliornermut atorneqarsinnaanerat, Trumpip Twitterikkut ikkussamini akerleriissutaasumi ilaatigut oqaatigaa.
- Allakkatigut taasinerit aqqutigalugit peqquserluttuliortoqarnissaa allaqqunneqarsinnaanngilaq, Trump Twitterikkut maajip ulluisa 26-anni ikkussamini ilaatigut allappoq.
Trumpip Twitterikkut ikkussaa Twitterimit maluginiarneqarsimavoq, allakkatigut taasinerit pillugit paasissutissanik eqqortunik piniartoqarnissaa Trumpip ikkussaata ataani kaammattuutigineqarluni.
Trump: Tamat oqartussaaqataanerannik innarliisoq
Allakkatigut taasinerit qinersinermi peqquserluttuliornermut qaqutikkut atorneqartartut Twitterip oqaatigaa, præsidentillu oqaasii eqqortuunnginnerarlugit.
Trumpip Twitterikkut saqqummiussai Twitterimit maannamut iliuuseqarfigineqartarsimanngillat, ikkussat isornartorsiorneqarnissaat apeqquserneqarnissaalluunniit maannamut tunuarsimaarfigisimallugu.
Twitterili allakkatigut taasinernut tunngatillugu politikkikkut qanitttukkut allannguisoqarnera tunngavigalugu erseqqissaassuteqarpoq.
Twitterip Trumpip ikkussaanik oqaaseqaateqarnera tamat oqartussaaqataanerannik innarliisoq tamannalu præsidentitut akuersaarumanagu, Trump Twitterikkut kingorna allappoq.