TV2-kkut nunatsinnukalerput
Danmarkimi nipilersortartuni nuanniinnerpaatut namminneq taasarput, maannalu tassa Nunatsinnukaqqittussanngorput, qularnanngitsumik nuannersumik tusarnaartitsiartorlutik.
Allattoq Elisa Isaksen
Nipilersortartut TV2, Steeffen Brandt siuttoralugu Nuummi Ilulissanilu qaammatip tulliani tusarnaartitsissapput. Londonimi tusarnaartitsinissaat eqqaasanngikkaanni ukiormanna tusarnaartitseqattaarnerisa Nunatsinni angalanerat kingulliussaaq. Tamanna TV2-kkut nittartagaani takuneqarsinnaavoq.
Nipilersoqatigiit Nuummi Inussivimmi oktobarip arfineq-aappaani tusarnaartitseriarlutik, oktobarip aqqarnanni Ilulissani Hotel Arcticimi nipilersussapput.
Nipilersoqatigiit TV2 ukiormanna ukiunik 30-nngortorsiorlutik nalliuttorsiortut, cd-mik 17-issaannik ukiormanna saqqummersitsipput, taasaminnik "Showtime".