TV-ikkut aallakaatitassiaq Qapuk unnugu aallakaatissaaq

Qapuk assigiinngitsunik isumalersorneqarsinnaavoq. Immiap qapua, avannaamiut oqaluttut qaputtunik taasaarpaat, imaq mallertilluni aamma qappiorsinnaasarpoq.

Sunaluunniit isuma atoraluaraanni TV-kkut aallakaatitassiaq assiginngitsunik piorsarsimassutsimut eqqumiitsuliornermillu tunngassuteqartunik aallakaatitassiaavoq, sisamanngornerit tamaasa sapaatip akunnerini tulliuttuni arfineq pingasuni isiginnaarneqarsinnaassalluni.

Aallakaatitassiamik Qapummik isumassarsisuuvoq, filmiliortartoq eqqumiitsuliortorlu Inuk Silis Høegh.

Markus E. Olsen Randi Brobergilu Qapuk aallakaatinneqaraangat inuttaasassapput, kalaallit eqqummiitsuliaat piorsarsimassutsimut tunngassuteqartut, sinerissamiillu nammineq videuliat quianartut aallakaatinneqarneranni ilisarititsisassallutik.

Taakkua saniatigut isiginnaagassiamik nangeqattaartumik pissanganartuliamik Qapummi takutitassaqarpoq. Takutitassiaq nangeqattaartoq asanninneq, ningarneq, sangianneq salluliorneq uukapaatitsinerillu pillugit isiginnaagassiaavoq, isiginnaartitsisartoqatigiit Silamiut suleqatigalugit suliarineqartoq.

TV-kkut aallakaatitassiaq Qapuk siullermeerluni unnugu nalunaaqutaq arfineq marlunut KNR-TV-ikkut aallakaatinneqassaaq immikkoortuatalu aappaa Qanorooq aallakaatinneqareeriarpat, nalunaaqutaq arfineq pingasunut tanneq aqqanerniit qulingiluat tungaanut aallakaatinneqassalluni.

Qapuk sisamanngornikkut aallakaatinneqaraangat qallunaatut allagartalersorneqartassanngilaq, sapaatikkulli aallakaateqqinneqarnerani qallunaatut allagartalersorneqartassaaq.