Aallakaatitassiaq akunnerni sisamanik nikingassuteqarluni aallakaatinneqartartussaq, svenskit TV-ata aallakaatitsisarnera taarserlugu TV-2 inissinneqarpoq.
Nuuk TV aqqutigalugu isiginnaarsinnaanermut qaammammut akiliutigineqartoq 20 koruunimiit 30 koruunit angullugit qaffanneqassasoq, TV-qarfiup siulersuisuisa aalajangerpaat. Kanaalinik assigiinngitsunik isiginnaarsinnaanermut qaammammut akiliutit assigiinngitsut aallaavigalugit qaammammut akiliut qaffanneqassaaq.
-Akiliutip qaffannerisa isertitsissutaasa ilaat Nuuk TV-p aallakaatitsisarnerminut siammarterinermi ineriartortitseqqiinnissamut atorneqassapput. Pilersaarutaavoq TV-kkut aallakaatitsineq digitaliusoq marlunnik ilaneqassasoq.
Tele-p kabelit immap naqqatigoortut piviusunngortinnissaanut ineriartortitseqqiiniarluta periarfissanik nutaanik aamma piareersaateqarpugut, Nuuk TV-p pisortaa Jens Olsen oqarpoq.