Oqartoqassanngilaq nunatsinni politikerit pissutsinut malinnaannginnerarlugit.
Teknikkimik atuileruttorfitsinni naalakkersuisunut ilaasortaq Josef Tuusi Motzfeldt nittartakkami qupperneqalersimavoq – taanna tassaavoq Internetimi ullorsiutitut taaneqarsinnaasoq.
Tuusip ullorsiutaa “aappaluttoq” IA-p nittartagaani takuneqarsinnaavoq, naalakkersuisunullu ilaasortap allaaserisaa siulleq tassaavoq ukiup taarseruttornera, aqagumiit qaamanertusiartoqqilersussaq.
- Ullukinneq tikeqqipparput. Ullukinnerup nalliussineratigut takuteqqinneqarpoq kristumiussuseq kisimi juullimut pissutaanngitsoq. Nunani issittuni najugaqartutut tamanna eqqaamasariaqarparput, Josef Motzfeldt juullimi pilluaqqussutimini ilaatigut taama allappoq.