Tuusip akissummini pissusilersornera inatsisartut siulittaasoqarfianut

Nunanut allanut niuernermi naligiissaarineq ernumanaateqarpa? Akileraartarneq qanoq-una aaqqissuunniarneqartoq? Tamakku allallu apeqquterpassuit Demokraatiniit naalakkersuisunut apeqqutigineqallattaarput. Josef Motzfeldtilli Lene Knüppelimut akissuteqaatimini oqaasertaliussai uparuartariaqarsorineqarput.

Josef Motzfeldt ima ilaatigut oqaasertaliivoq:

”Naalakkersuisutut suliassarinngilara nassuiassallugu imaluunniit erseqissassallugu §36-imi apeqqusiisarfiup imaa taassumalu siunertaa. Taassunga atatillugu qaatiginngittoorsinnaanngilara apeqqutigineqartut arlalit tusatsiakkanik ilaatigut tunngaveqartut aammalu immikkuullarissumik atortorissaanikkut - allaffissornermi isumaqartut politikkimullu atuumassuteqanngitsut eqqumiigigakkit. Apeqqutit tamakkerlugit akinissaat qinersimavara, suli annertunerusumik tunngavissaqanngitsumik tusatsiakanik pilersoqarnissaa pinngitsoorusullugu. Nalinginnaasumik tusatsiakkat uppernarsineqarsinnaangitsut oqarseqarfigerusunngilakka. Tamanna kajuminnartutut piviusorsiortumik politikkut apeqqutinik suliarinninnissamut ilaatinnissaa isiginnginnakku.” Josef Motzfeldt Lene Knüppel-ip akileraarnermut tunngasumik apeqquteqaataanut akissummini taama allassimanera Demokraatit politikkikkut oqaaseqartartuata Palle Christiansenip uparuarpaa:

-Taamatut nipilerluni akineq, Demokraatinit nuannarinngilluinnarparput. Apeqquteqaraangatta tassaasarpoq sulisitsisut sulisuminnut aperineq, taamaanneranilu soqutiginngilluinnarpara Tuusip apeqqut nuannarineraa nuannarinnginneraaluunniit, imaluunniit apeqqutigineqartumut tunngatillugu apeqqut qanoq ittuunersoq. Apeqquteqaateqartoqaraangat naalakkersuisut pisussaapput akissallutik, tamannalu pisassaaq piumasaqaatit naapertorlugit ullut qulit qaangiutsinnagit.

- Apeqquteqarnerit siunertaat apeqqutigigakkit Palle Christiansen oqarpoq:

Apeqquteqaateqartarpugut paasissutissat naalakkersuisut atorfilittaasalu tunniussinnaasaat tusarusullugit, soorlu aamma apeqquteqaateqartartugut tusarusullugu pisunut assigiinngitsunut naalakkersuisut isumaat.

Palle Christiansenip ilanngullugu oqaatigaa apeqquteqaatitik inatsisissatut siunnersuutissatut piukkunnaateqarnersut nalilersortaritik.

Akissuteqartup pissusilersornera pillugu Demokraatit inatsisartut siulittaasoqarfianut saaffiginnissamaarput.