Tuusi: Politikkikkut malersuineruvoq

Inatsisartut siulittasuat Josef Motzfeldt siulittaasoqarfimmik aqagu ataatsimiigiaqqusivoq, hashi inigisaani nassaarineqarsimaneragaasoq pillugu nassuiaassalluni.

Inatsisartut siulittaasuata pisatai atorfimminut atatillugu illussaanut ISS-ip nutsertitsisuisa pingasunngormat nuunnialeramikkit pasilliisoqalerpoq, hasiminermik nassaarmata, politiinukallugulu. Inatsisartut siumlittaasuata unnerluussutit eqqunginnerarpai. Illuanik tunuarnissaa Siumup piumasarigaa.

- Inatsisartuni siulittaasorput ataqqissagutsigu ileqqorissaarnerussaaq, nammineerluni tunuarallaruni, suliap uuma naammassineqarnissaata tungaanut, Siumup siulittaasua, Aleqa Hammond, oqarpoq.

- Nassuiarsinnaangilara, taanna nassaarineqarsorisaq qanoq ililluni illunnut pisimanersoq, Josef Motzfeldt oqarpoq. Taanna politiinut ippassaq nalunaarutigineqareersorlu politiit ullaaq apersorpaat. Josef Motzfeldtili nammineq oqarpoq, tamanna peqatigiilluni imminut saassussinerusoq.

Taanna assingusumik misillereernikuulluni oqaluttuarpoq.

- Taamaammat pisoq ajuusaarnaraluartoq tupaallaatiginngilara. Kisianni arlaannaalluunniit pisuutissallugu pissutissaqanngilanga, Josef Motzfeldt oqarpoq. Kisianni maannakkut tunuarnissamik eqqarsaateqangilaq.

Radioaviisimut oqarpoq, politiit qanoq iliornissaat maanna utaqqissallugu.

Partiiata siulittaasua, Naalakkersuisut siulittaasuat Kuupik Kleist, aamma politiinut utaqqivoq.

Siumulli siulittaasuata Aleqa Hammondip aalajangiusimavaa, Josef Motzfeldt pisuunngitsutut oqaatigineqarsinnaanngornissami tungaanut tunuarallartariaqartoq.

- Eqqissilluni nammineq inuttut suliariniarliuk, Aleqa Hammond oqarpoq.

Kisianni ajornanngippallaangila, Inatsisartut siulittaasuat tunuaqqussallugu, hashiuteqarsimanerarlugu politiinut oqariarluni?

- Kikkut qanoq iliuuseqarsimanersut, uagut akuleruffigisinnaanngilarput. Kisianni Inatsiartut siulittaasuattut issiatilluni pinerluuteqarsimanermik arlaatigulluunniit pasillerneqaraanni tunuarallarnissaq ileqqorissaarnerussaaq, Aleqa Hammond oqarpoq.